Kam chibynta wow pynkhlan ya ki kaam pynroi ha ki thaaiñ palatsor, u Montri Rangbah ka jylla u Conrad K Sangma, da saam yarap u cha ki warep, ki seiñ pynlai yaaw ya ki mar, wa ki khynroo ha Kharkutta, North Garo Hills ynne ka sngi.
U Montri Rangbah da saam yarap poisa u kamwa T. 19.10 lak cha ki 30 tylli ki seiñ pynlai yaaw ya ki mar namo ki Producer Groups ka North Garo Hills District kiwa embynta ha ki kaam psan sniang, ki warep sy’iñ, ladaw wa kiwi kiwi.
Da e leh T. 12.25 lak cha ki 1225 tylli ki manyung hapoh ka ‘FOCUS+’ kawa man ka Farmer’s Welfare Programme. I sdang ya ka ‘FOCUS+’ toh wow yarap yoh nong ya ki tre jylla lyngba kani ka Scheme. Na kani ka Scheme da yarap T. 5,000 cha ka wi ka manyung ya kawa daw phah bait cha ki Bank Account yong ki warep.
Chooh chooh lyngba ka Rural Backyard Piggery, ‘PROGRESS’, 2000 tylli ki khon sniang (wa kynthup ya le tylli ki sniang kynthai wa uwi u sniang chynrang) da saam cha ki 500 tylli ki manyung kiwa haap hapoh ki 3 tylli ki Block ka North Garo Hills District.
Ka Scheme ‘PROGRESS’ em ko ka thong wow rap pynbha ya i rukom im ki warep ha i psan mrad lait na i thung i tep. Lyngba kani ka Scheme da booh thong wow pynyoh nong ya kamwa 10,000 tylli ki manyung wa duna ha i yoh i laa wei wow pynku yei khayi doh sniang ha ka jylla.
Kamwa kheiñ yonglang da saam leh T. 4.8 lak cha ki 11 tylli ki seiñ khynroo hapoh ka ‘YESS’ kawa man ka Scheme pynkupbor ya ki khynroo. Ka YESS toh ka Scheme wow pynchlur ya ki khynroo wow ku ha waroh ki liang wei khamtam ha ka Sports.
Neiliang u Conrad K Sangma da ong u wa i bha i miat yong ki warep wa ki bru wa chong wa sah ha ki thaaiñ palatsor toh ka thong wa haphrang dooh yong ka sorkar jylla. Ini toh neidaw wa ki warep ka jylla toh u yohlaad ki wow khait ya u soh ki yow ku ka jylla.
Da ong u leh wa ha kini ki soo snem chiteiñ, ka sorkar jylla yarap ko wow pynyoo ka luti ya ki warep wow sdang ki ya ki kaam yong ki wei wow seiñ khih seiñ kreh ki deiwa pynrap wa ym toh u kut i du heini donhi tangwa wow kreh chitom yow poi cha ka thong.
