Ka seiñ JSM wa JYF da yachem ki ya u CEM wa u EM ka Political, JHADC hajrong i e kulmar ya ki Recommendation Letter da ki kattu katni ki Waheh Chnong ka Ri-loom Jaiñtia ya ki baar jylla wow yoh kaam yoh jaam wei wow seiñ khih.
Neiliang ki ar seiñ da lai booh ki da ka ujor cha u Chief Executive Member, JHADC hajrong i e Recommendation Letter/Accommodation Letter da ki kattu katni ki Waheh Chnong hapoh Ri-loom Jaiñtia cha ki baar jylla wow yohlaad u psiah khlieh wow knieh ya i ja-kpoh yong ki tre chnong kiwa ye ki bru yong i wow kreh.
Hajrong ini, ynnin kiwa yahkhmat ki ar seiñ da yachem ki wa u EM wa pait ya ka chnat Political, u Finelyness Bareh wa ka sahep Administrative wa Political Department ka JHADC deiwa emlang ki kattu katni ki Waheh Chnong na Ri-loom Jaiñtia.
Ha ini i yaklam da rai wei da mynjur da ki Waheh Chnong wow pyndam noh ya kini ki Recommendation/Accommodation Letter wa da e cha ki baar jylla wei wow tyrwa noh da i pyrtuid yong ki bru yong i kiwa da biang kyrdan wow leh ya kini ki jait kaam wei ki ar seiñ da kular ki wow synraan lang ya ki chnong wa ki Waheh Chnong wow pyntikna wa ki bru yong i toh u yoh hok ki neibhah wa kini ki jait kaam lada ha i kreh sorkar toh man ki du kam ki Grade IV kiwa ki bru yong i hi ye ki wow kreh.
Ki seiñ da ong ki wa ym kwah ki wow pynmih yei pyrtuid kini ki chnong tangwa ini toh u man ko ka maham ya waroh ki Waheh Chnong ka Ri-loom Jaiñtia won man ki kiwa husiar hawa e ya kiwon kiwon ki kot ki sla ya ki baar jylla khlem da bichaar bha neibhah wa ini daw wanrah yei maa wa khroo ya ka jaitbru.