I kreh chitom yong ka sorkar jylla wow pyndap pynbiang yei chait i khiah da mih soh i deiwa yoh wow rah ya ka khusnaam ‘Ayushman Utkrishtata Puraskaar 2022’ (Ayushman Excellence Awards) ha ki ar bynta na ka National Health Authority (NHA), ha nongbah New Delhi.
Ka jylla da yoh ko ha ka kyrdan kawa nyngkong dooh hei boon ki Doctor wa ki Nurse ha ka jylla wei da yoh leh yei naam Best Performing State na ki jylla wa khian neibynta i ye wow pynkrehkaam ya ka Scheme Ayushman Bharat Pradhan Mantri Jan Arogya Yojana yong u snem 2021-2022.
Hajrong ini, u Montri Rangbah ka jylla, u Conrad Sangma da ong u wa ka sorkar jylla dang pyrchang ko wow pynbha chooh chooh ya ki laad e sumaar neibynta kiwa boon walang khnang yow man ko i kyrkhu. Da ong u leh wa deiwa ya krehlang ka sorkar jylla wa ki bru ka jylla da yoh wow rah ya kini ki artylli ki khusnaam.
Ya ka khusnaam deilang wa i e sñiawbha da saam da u Montri Khynnah ka sorkar India, u Mansukh Mandaviya ha ka sngi pynhaap pyrda ya ka Arogya Manthan 2022, kawa man leh i lehkmen yei dap 4 snem yong ka Ayushman Bharat PMJAY.
Ka Ayushman Bharat PMJAY toh ka chnat sorkar kawa e ram ya ki bru wa dooh kawa da kyrchaan poisa da ka sorkar pyrdi da ka thong wow yarap ya kiwa dooh wa duk wa kyrdooh wow chah sumaar ha ki Hospital kawa poi chadooh T. 5 lak ha ki Hospital sorkar wa ki Hospital ki bru samen kiwa da ya soi soskular wa ka sorkar.
Ka Ayushman Bharat Digital Mission (ABDM) em ko ka thong wow pynku ya ka rukom sumaar lyngba ki kor sayan wa thymme wa da sdang pynemkaam ha ka ri waroh kawi. Kani man ko ka laad ka luti wow pynyabi ya idæ hapyrdi kiwa sumaar wa kiwa chah sumaar lyngba i stat thymme ka juk wa katni.
