Ka Khasi Students’ Union (KSU) Narpuh Circle lyngba ka kyrwoh na u Chanmi Syrti, Education Secretary da pyntip ko cha waroh ki khynnah, ki khynroo khyllood ka thaaiñ Narpuh kiwa da dep yaleh wow yoh pdiang yei pynkup burom da ka khusnaam kawa tip kam ka “11th Mait Shaphrang Academic Award 2022”, wow wan mih ki ha ka 06-10-22 nadooh i por wa 10:00 waje i step ha Lumshnong Community Hall.
Ha chwa u sdang saam ya ki khusnaam daw em leh ka Quiz Competition kawa daw chimbynta da ki khynnah skur yong waroh ki Secondary wa Higher Secondary School wa em hapoh ka thaaiñ Narpuh.
Kiwa sikai skur u jied ki du ar ngut na ka wi ka skur wow chimbynta ha katai ka Quiz Competition kamwa ka seiñ da dep pyntip dang ini wa dep cha waroh ki skur. Wei ya kiwa yoh nyngkong, wa ar wa kiwa yoh wa le ha kani ka yakob Quiz, ka seiñ daw pynkup burom ko deiwa e khusnaam.
Ha katai ka jooh ka sngi ka seiñ daw pynbna ya kiwa jop ha ka yakob thoh Essay hajrong ka Sngi Pynneh Pynsah Rymaw (World Environment Day) ya kawa ki 5 tylli ki skur hapoh ka thaaiñ Narpuh da wan ki wow chimbynta ha katai ka yakob thoh Essay kawa la dep pynman nadooh ka 05-06-22.
Ya ki skur kiwa wan ha ka kyrdan wa nyngkong, wa ar wa kiwa yoh wa le ha katai ka yakob thoh Essay daw pynkup burom deiwa e ya ki Certificate wa Memento.
