Ka seiñ Hynniewtrep A’chik National Movement (HANM) ynnin ka sngi da lai yachem ko wa u Montri ki Kaam Pohyung, u Lakmen Rymbui yow dawa tuklar u yei chah pyndik kiwa chong chnong ka Muktapur, West Jaiñtia Hills District ha ki chipai ka Border Security Force (BSF).
Neiliang u President ka HANM, War Jaiñtia Circle, u Shaniahlang Suchen da pynbaad u wa ki BSF da pteiñ ki wow pyndik khamtam ya ki warep kiwa hap wow lai cha ki lyngkha kiwa em hajan u pood wa ka Bangladesh.
Da ong u wa kiwa lai khih mylla leh da chah pyndik ki man-ka-sngi ha ki bru ka BSF kiwa da pynsangeh leh ya ki kari wa kit ya ki mar wa emkaam iwa da wanrah yei tieñ ha kiwa chong chnong ka Muktapur wa kiwi ki chnong wa em chajan.
Neiliang u President wa heh dooh ka HANM, u Lamphrang Kharbani da ong u wa ini ym toh i sien wa nyngkong wa ki bru wa sah ha khappood da chah pyndik ki ha ki BSF wei da toh i por ya ka sorkar wow leh ko iyi iyi hajrong ini deiwa yaklam wa ki heh ka BSF.
Heijooh i por da ong u wa ym toh wym em sñiawngooh yei kreh ki BSF yow khang yei wan psiah tooh ki nong Bangladesh tangwa ym ye chah de yei chah pyndik kiwa chong chnong.
Da pyntip u leh wa ha ini i yachem wa u Montri da khana u wa da dep u wow khut ya u IG ka BSF yow paan pynche wei da phah ya u IG wow yaklam u wa ki bru yong oo heiyatoh wa ini.
