Ki waheh chnong toh u lai ki dei langær cha ki Anganwadi Centre wow pyntikna wa kreh ki: DC  

Ka Rashtriya Poshan Maah wa chi bnai ha East Jaiñtia Hills District wa pynman da ka yung krehkaam ka District Programme Officer, ICDS (Cell), chirup wa kiwi ki chnat da kut ko ynne ka sngi ha Jalaphet Bri-Sutnga Community Hall hajrong ka thong “Mahila Aur Swasthiya” wa “Baccha Aur Shiksha”. 

Ha kani ka sngi u Deputy Commissioner, East Jaiñtia Hills District, u A. Baranwal da man u kam u kongsan hei emlang u Dr. Dominic Shylla, District Medical and Health Officer, ka M.J. Shylla, District Agriculture Officer, u T. Kyndiah, District Child Protection Officer, ka D. Iakai, I/c Child Development Project Officer (CDPO) wa u R. Dkhar, Waheh Chnong ka Jalaphet Bri Sutnga. 

U A. Baranwal, hawa e yei klam da e khublei u ya ka ICDS wa da pyndep deiwa jop ya kani ka Poshan Maah. Da ong u wa ki kaamram kiwa kreh Anganwadi toh u pyntikna wa biang ki baam ki khynnah kamjooh ki kynthai wa punkhon wa kiwa e yimbu-khon. Da kyrpaad u leh ya ki dorbar chnong wa ki waheh chnong wow lai cha ki Anganwadi Centre dei langær wow pyntikna wa biang ki tiar ki tiar wa i e chakri ki. 

Da pyntip u leh wa ki Learning Kits, wa ki Elementary Education Kits da saam cha ki 50 tylli ki Anganwadi Centre ka District wei ki Model Anganwadi Centre daw chna ya ki deiwa jied ya kiwa lehbha dooh. 

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Chwa ini ka D. Iakai da khana ko ya ki thong yong ka Nutrition Programme toh wow pynman ya ki khynnah kiwa chait wa khlan khamtam ya ki khynnah wa hapoh 6 snem i rta wa ki kynthai wa punkhon wa kiwa e yimbu-khon. Da batai ko leh yei myntoi wow e yimbu ha ki 6 bnai wa sdang, ki jait baam kiwa yarap ya i doh i pran wa kamjooh wow em kpær yung yow thung ya ki jhoor wa baam ha yung kiwa thung khlem pynemkaam dawai sboh. Da kyntu ko leh ya ki kynthai wow kreh chirup wa kiwa kreh Anganwadi wa ki ASHA. 

Kiwi kiwa da klam kynthup ki ya u Dr. Dominic Shylla, ka M. J. Shylla, u T. Kyndiah wa kiwi kiwi. 

Ha kani ka sngi da saam leh ya ki Award cha ki manbei kiwa leh langær ya ki ANC Check-up, i e tika wa kiwa lai langær cha ki Anganwadi Centre (AWC). Wei da saam leh ya ki Award cha ki kiwa lai langær cha ki Pre-School wow phah sylli ya i chait i khiah yong ki ha ki AWC.