Ka Mawlai SC kawa da dep jop chwa ya ka Shillong Premier League 2021-22, ynne da pynkut ko ya kani ka samoi ka SPL deiwa jop da 2-1 ya ka Langsning ha ka yalehke wa 56 kawa man leh kawa khaddooh ha Third Ground, Polo, Shillong ynne ka sngi.
Ha kani ka sngi da wan wow pynhaap pyrda wei wow saam ya ka khusnaam da u Banteidor Lyngdoh, Montri ka chnat Sports and Youth Affairs.
Ka Mawlai da dep jop ko ya ka SPL ha uni u snem nadooh ka 9 tarik uni u bnai kawa da sdang nadooh ka 15 tarik Naiynru.
Ka Mawlai da yoh ko leh ya ka song poisa kawa T. 3 lak na kiwa Sponsor ya ka SPL ha uni u snem ka OC Blue kawa da e kti da kiwa mihkhmat ka OC Blue, u Pijush Dey wa u Lakshya Jit Borah. Da emlang leh u Shillong Sports Association President, u Eugeneson Lyngdoh, MLA wa kiwi ki dkhot ka SSA deilang wa kiwa pynman ya kani ka lympung yalehbol.
Da ini i rem, ka Langsning da yoh ko hei wa le iwa da pynyoh yei wa ar cha ka Rangdajied United FC kawa da yoh leh T. 1 lak.
Ya ki kool ka Mawlai da thap ha ka minit wa 32 lyngba ka Free Kick u Brolington Warlarpih (Captain) kawa da yoh u Donlad Diengdoh u pynpsiah chapoh ka jaar wei da yoh ko sa chi kool chwa u kut ka kylla step lyngba u Fullmoon Mukhim (45’+1) uwa da yoh u thap dei khlieh ya ka bol wa chut Corner.
Ka Langsning da yoh ko wow thap kool lyngba u Arnesius Marwein ha ka minit wa 74.
Ha kani ka samoi ka SPL da thap 166 tylli ki kool iwa deiwa kheiñ yonglang da man 3 kool kawi ka yalehke wei da em 75 ngut kiwa yoh u thap kool.
