Ka jylla Meghalaya yei ye ko u pynkrehkaam pura ya ka Scheme ka sorkar pyrdi kawa tip kam ka Jal Jeevan Mission (JJM) wow pynbiang ya ka umbaam umdih deiwa pynpoi umkor cha ki thlu yung, ynne ha ka rynsan saam khusnaam yong ka ri kam chibynta ka Swachh Bharat Diwas da chah pynkup burom ko.
Ynne ka sngi kawa man leh kam ka sngikha u Mahatma Gandhi, ka President ka ri, ka Droupadi Murmu da pynkup burom ko ya ka jylla kam ka Best Performing State wa pynkrehkaam ya ka JJM ha ka ri.
U Montri ka chnat Public Health Engineering (PHE), u Renikton Lyngdoh Tongkhar da lai pdiang u ya kani ka khusnaam heiwa da emlang leh u Gajendra Singh Shekhawat, u Montri ka sorkar pyrdi uwa pait ya ka Jal Shakti ka sorkar India.
Ka jylla Meghalaya da man ko ka jylla kawa khian hawa nujor wa kiwi ki jylla ka ri, tangwa da wan ko hei wa ar ha ka thup ki jylla kiwa ye u pynkrehkaam pura ya ka JJM. Ha ka thup ‘Har Ghar Jal’ (HGJ), ka Meghalaya da wan ko hakhmat bar ya ka Assam, J&K, Kerala, Manipur, Nagaland, Rajasthan, Sikkim, Tripura, Uttarakhand, Karnataka, Goa wa kiwi ki jylla.
Ya ka JJM da sdang ha u Naisaphra 2019 hapoh ka jylla heiwa da em du 4,500 tylli ki manyung ha ki thaaiñ palatsor kiwa da yoh umbaam umdih da ka umkor ha thlu yung tangwa katni da ku cha kamwa 2.53 lak tylli ki thlu yung kiwa da yoh umkor. Chooh chooh kamwa 100% na ki manyung kiwa em ha ki 1500 tylli ki chnong katni da yoh umkor ki ha yung.
