Ha ka thong wow wanrah yei khooid i pliah ki soodong sookun ka chnong ka thaw, ki bru wa chong wasah ha Myntdu Pynthorneiñ ynne ka sngi Thymblein 4 tarik da ya mih paidbah ki wow pynman i kreh yonglang deiwa lum wa pynkhooid wei thwat yei khloo ha chilynter u sarok wa haap hapoh u pood u ang ka chnong.
Chwa wow sdang i pynkhooid da em ka yalang yahkhmat watbian heiwa u Purabok Lamare, Waheh Chnong Myntdu Pynthorneiñ da e u i klam wa tbian hajrong ka thong yong kani ka sngi.
Ini i kreh yonglang ha kani ka sngi daman i ar bynta chibynta dathwat, dalum da pynkhooid chilynter ki bynta u surok wei chibynta wan toh i pynkhooid ya ki rood wah Myntdu.
Chooh chooh neiliang u Waheh Chnong da e u leh ka wyrta chula wei kyrpaad ya ki paidbah walai wa wan kamjooh ya ki lok ki jor wa wan khwe næ kiwa saithat saitnep ha ki bynta ka wah Myntdu wow yakrehlang dei wow dam u noh taroi ya ki jhep ki jakhlia, ki Plastic, ki klong kat chawa yoh khnang wa ka chnong ka thaw kamjooh ki bynta ka wah Myntdu u yohlaad ki u sap u kup yei dur wa khooid wapliah.
