Ka seiñ Jaiñtia Students’ Movement (Jowai Circle) ynne da hiar ko syndet syndet yow beh ya ki baar jylla kiwa chongdai ha rood sarok ka Iawmusiang, Yaaw Chyiap wa kiwi de ki bynta wei da leh ya ini hadien wa ka seiñ da yoh ko yei ujor wa kiwa chongdai da chim ki ya ki luti lai kjat nadooh na Yaaw Chyiap hadooh wa poi cha ka yung krehkaam u DC, Jowai.
Ka seiñ da chem ko wa boon ki baar jylla toh kiwa khlem biang ki kot ki sla kam ka Trading License, Labour License wa Temporary NOC naki Waheh Chnong.
Kamtæ neiliang ka seiñ khlem kynran dien da beh ko naphang deiwa maham deiwa khor ya kini ki baar jylla wa lada sa chisien chong biang ki ha kini ki thaw, daw leh deiwa eh ya kini ki baar jylla kiwa chongdai pyrchah ya ka aiñ.
Ka seiñ da dap ko dei sñiawkhia wa boon ki paradoh parasnaam ym yoh ki wow chong ha kini ki thaw katwa ki baar jylla won da nood ki wow chong wot la ym em ki ki kot ki sla wa biang.
Ka seiñ da ong ko leh wa ini pynyoo ko yei tlot ka JHADC wow kdoh u khoom hadooh wa boon ki baar jylla kiwa chim kabu wow rah du ya ki Aadhaar kam ka sakhi.
