Ka Balang Catholic Sohmynting, West Jaiñtia Hills ynne ka sngi da kyrkhu pynkyntang ko ya ki chrot nyngkong wada pynyieñ neibynta u chna ya ka yungmane thymme kawa da e seiñ yow sdang deiwa e yarap T. 5 lak da u MLA ka thaaiñ u Wailadmiki Shylla.
Ha ka yalang tbian, u Chairman ka Construction Committee, u Laribha Kyndait khana u wa ya kani ka yungmane da mang u chna hei lut wa T. 1 klur wei hanla hei pyrkhat yong ki kam ki khon ka Balang wymtoh iwa suk u yoh ki ya ka mang tyngka leh, tangwa yooluti u wa dei yakrehlang daw ye u pynmankaam.
U President ka Jowai Parish, u F. Synnah hawa klam da ban joor u ya ki paaid wa ngait ka Balang wow man ki bru wa tip u sñiawngooh ya iwon iwon i kyrkhu i yarap wa yoh ki, neibhah i em yei mynsien sñiawngooh pynphooh pynphieñ ko yei manbru.
Neiliang u Wailadmiki Shylla MLA hawa klam ong u wa ym duna de ya T. 9 lak tam i yarap wa da e u cha ka Balang Catholic Sohmynting wei ini i yarap toh neibynta ki khon ka Balang waroh yow pynstiñ yei synniang yonglang ki.
Ong haroh u wa kam uwa mihkhmat ka thaaiñ iwa hakhmat dooh da pyrchang u katwa ye u pynyoh yei emkaam wa yatoh wei roi i paar, neibhah khnang wa ki bru u yoh ki yei kwah yong samen emkaam chwa toh i tip i stat wa i chait i khiah.
Kamwa man kattæ ong u wa ka chnong Sohmynting da kylla dur ko lyngba i ye u chna pynheh yow sarok wa T. 44 klur hadooh laad Moodymmai, neitæ i chna pynmiat ya ki sarok pohchnong, wei neini wym slem de daw saam Work Order cha ki dong waphær najrong wow pyrchang khynjoh haroh u ka Scheme yong samen cha kitu ki wym pu em yoh.
Hawa paan kyrchaan haroh u na ki paidbah ong u, “Nga da pyrchang O u pynyoh yei emkaam yong phi, chong sa ha phi won la daw e bor chooh chooh hi phi ya nga, wei lada nga jop O, sa chisien T. 10 lak daw e yarap biang O ya phi”.
Kiwi won wa e yei kyntien kyrkhu kyrdoh ya ka Balang Catholic kynthup u MDC ka thaaiñ u Lakhon Dkhar, u Dolloi ka Elaka Amwi, u Jemewell Pyrtuh, u Waheh Chnong ka Sohmynting, u Bravestar Phawa, u Dapoi Pyrtuh, ka Planky Pyrtuh wa kiwi.
Da ong haroh ki kamwa ka ktien u Blai ong ko, paan te daw e, tied te daw wai, kamtæ da sakhi ki wa u MLA leh da knær u yei yarap kamwa ka Balang Catholic da paan ko.
Ha kani ka sngi u MLA da e yarap haroh u cha ka seiñ khynroo yong ka Balang Catholic kamwa T. 50,000.
Neitæ hadien wa u Fr. H. Lamare, Parish Priest Jowai Diocese da dep u wow e i kyrkhu kyrdoh, ki bru waheh nadooh u MLA, MDC ka thaaiñ da chimbynta ki u pynhaap khyndaw bilat ha ki chrot wada pynyieñ nyngkong.
