Ha ka lympung yakob yah kari namo ka Off Road Challenge ha Kharsati Park, Umtham Ri Bhoi District wa pynman da ka Adventurous Hynniewtrep Off Roaders (AHOR) ha ka 7 wa 8 tarik uni u bnai, ki arngut ki kynthai na West Jaiñtia Hills wa kynthup ya ka Lambha Daka Patlong wa ka Pynshngainmon Dkhar leh da lai ya chimbynta ki.
Kiwa wan ya chimbynta ha kani ka lympung toh na kylleiñ ka ri-loom Khasi wa Jaiñtia wei da em leh kiwa na Assam. Ki kari wa ya chimbynta em ki hadooh 27 tylli ha ka kyrdan Stock Category wa 9 tylli ha ka Modified Category.
U kongsan yong kani ka sngi toh u Kyrmen Shylla, Montri sorkar wa u Sunshine Makri kam u symbood kongsan kiwa da e yaroh ya ka AHOR wa pynman ko kam kani ka jait Sport kawa yoosuk bha wei kawa khriñ bha ya kiwa boon.
U Kyrmen Shylla ong u wa kani ka Sport da khriñ ko leh ya oo deiwa yooluti wa ha ka yakob wa daw pynman biang, oo leh da man u uwa pynkhreh wow wan ya chimbynta.
Kiwa jop ha ka Modified Category toh u Mandilost Nongbri, wa ar u Ralph Lyngdoh Nongpiur wa le won u Sandy Cliff Marbaniang.
Ha ka Stock Category da jop u Balamphang Marboh, wa ar u Sunny B Nongrum wa le won u Daiaineh Paliar.
Neitæ ha ka Stock Category yong ki kynthai da jop ka Chelsea Byrsat, wa ar ka Effie Pajat wa le won ka Lambha Daka Patlong.
