Ka yalang yong ka Executive Committee ka United Democratic Party (UDP), East Khasi Hills da rai wow pynkhlan ya ka Party neibynta wow lai cha ka Election MLA ha u snem 2023.
U President ka UDP East Khasi Hills, u Titosstarwell Chyne da ong u wa waroh 10 tylli ki Constituency ha EKH da khlan bha ki wei da kyrmen wa ka UDP daw yoh ko yei jop. Da khana u wa ka yalang da mynjur leh yei pyrtuid yong ki kyrtong wa da phah na ki 5 tylli ki Circle, wei ya kini ki kyrtong ka District daw phah cha ka State Election Committee yong ka UDP yow yoh yei mynjur neibynta ka Ticket wow yakhun ya ka Election MLA ha u snem wow wan.
Kini ki Constituency kiwa da phah yei pyrtuid toh ka Sohïong heiwa da phah yei pyrtuid u HDR Lyngdoh, ka Mawsynram dei pyrtuid u Olan Suin, na Mylliem dei pyrtuid u Mitchel Wankhar, na Pynursla i pyrtuid u Anthony Kongwang wei na Shella dei pyrtuid u MLA wa katni, u Balajied Kupar Synrem.
Hawa yatoh wa kiwi ki Constituency, da khana wa ha Mawphlang daw chna thymme biang ya ka Circle. Kiwi ki wym pu phah yei pyrtuid ki kyrtong toh na Mawryngkneng, Mawkynrew, Nongkrem wa ka Sohra.
Hawa kylli hajrong i yaknieh Ticket ha Nongkrem Constituency hapyrdi u MLA samen wa katni, u Lambor Malngiang wa u MDC uwa man u Chief Adviser ka UDP, u Bindo M Lanong, neiliang u Titos da ong u wa ka District Committee ym pu yoh pdiang ko yei pyrtuid yong uwon uwon leh. Da ong u wa ha ka Party em ko ki kyndon krehkaam wym em wa ye u ong ya uwon u e Ticket.
