Da i yung chna ka SSRC Parish Namdong ya u para dkhot ha Khanduli

Ka Synjuk Seng Rangbah Catholic Parish Namdong ynne ka sngi da e kti ko ya ka yung wa da chna kyrpang ko ya u Jeral Siangshai deilang ka yung ka sem yong oo ha chnong Khanduli, West Jaiñtia Hills District.

U Jeral Siangshai toh uwa em 5 ngut ki khon wei ha ki 13 snem chadien nadooh wa yoh u ya u khon wa nyngkong da mih yung ki wei da chong da sah ki ha i yung trep hadooh kini ki sngi.

Da wan wow wai ya kani ka yung da u President ka Synjuk Seng Rangbah Catholic Jowai Diocese u Henry Manar, wei da kyrkhu pynkyntang da u Fr. Dominic Kympad, Spiritual Director Synjuk Seng Rangbah Parish Namdong hei emlang ki dkhot ka Seng Rangbah Catholic Parish Namdong wa kiwi.

U Karlic Siangshai, President Synjuk Seng Rangbah Catholic Parish Namdong khana u i daw wa jied ki u chna yung ya u Jeral Siangshai toh wa ha ka yalang yong ka Synjuk da rai ki wow leh ki kaam wyrai ya ki para dkhot wa da em khon em kti kiwa man leh kiwa dooh wa duk, wei toh leh u man kiwa chimkhia haki kaam Balang.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

“Heipor wa chim ya ka rai u leh ki kaam wyrai, ka synjuk ym em poisa ko chipiah leh, kamtæ dei e yumut u Fr. Dominic kam u Director ka synjuk da pynman yaka Fete wa chi sngi wei ka poisa da mih ko kamwa T. 91,000 tam, tangwa katwa i lut won da khynjooh ko cha ka T. 1,25,000, kamtæ yeiwa duna won da e yarap e sñiawbha da ki para manpa wa ki bru samen,” khana u Karlic Siangshai.

Yow chna ya ini i yung wa ar kamra da wan wow kreh da ki 100 ngut ki dkhot ka Synjuk Seng Rangbah Catholic Parish Namdong deilang wa kiwi kiwa da kreh sñiawbha chisien chi tayaw man-ka-sngi Choh-that iwa mut da pyndep u chna 8 sngi donhi iwa da leh hapoh ar bnai.

Neiliang u Jeral Siangshai won pynsñiaw u i sñiawngooh ya ki para manpa kiwa da kyrchaan ya oo deiwa ong leh kani da man i kyrkhu wa khroo hawa wyrchaw u wa ki 13 snem chadien wa chong u hei yung trep wa tymmoh da u phlang neibhah man ka ar snem da hap li thooh phlang u neibynta u kylliang phlang ya kani ka yung wei wow pynskem leh ya ki chrot yung. 

Neiliang u Fr. Dominic Kympad wa u Henry Manar da e yaroh ki ya ka Synjuk Seng Rangbah wa chim ki ya kani ka kaam leh wyrai kawa man chibynta u pynjan i yatoh hapyrdi u bru wow Blai.

Heijooh i por yooluti u leh wa kini ki manpa u nang ye chooh chooh ki wow leh ki kaam wyrai neini chakhmat.