Khnang wa kiwa sikai u yoh yumut wei sñiawthooh che ki hajrong ka National Education Policy 2020, ka Department of Education yong ka Thomas Jones Synod College Jowai haka 11 tarik uni u bnai da pynman ko yaka District Seminar wada wan chimbynta da kiwa sikai naki skur ki College waphær ka District.
U Phasmon Dkhar, Executive Member ka JHADC hawa wan wai ya kani ka Seminar ong u wa ki skur ki College toh ki thaw wa ye u pynku yei stap i tip, kamtæ man ki kiwa emkaam bha yow uwi pa uwi.
Neitæ kam kiwa sikai ong u wa em ki ka bynta wa kongsan heiyatoh wei stat i tip ki khynnah, wei em leh chiboon kiyi kiyi wa emkaam ya ki u em ki ha chrooh ki khynnah neibhah man kawa kor tam hakhmat yong ki.
“I yoh yei tip i stat wa biang yarap wei pynskem ko u jop wei wow yoh yei im wa kmen, najrong wa yarap haroh ko u pynku yei thij i pyrkhat yong samen waka imlang sahlang yow ye chooh chooh u lai chaphrang,” da ong u Phasmon.
Ong haroh u hawa yoh yei i stat wa biang ym mut du neibynta u yoh ki Certificate næ i su wa heh hei kaam wa kreh wa khih, tangwa e bor ko u miat u bha i im.
Kamtæ da kyntu kyrsu u wow man ki bru wa pteiñ u thooh stat na ki bei ki pa, na kiwa sikai, kiwa hayung hasem, ki lok wa kiwi.
Ka Prof. S.M. Sungoh, Department of Education, NEHU Shillong kam ka bru chemphang hawa e yei klam hajrong ka phang “4 Year Structure Under Graduate Program at the Higher Level”, ong ko wa kani ka National Education Policy 2020 toh kawa emkaam bha yow pynku yei puræ puthi wa salonsar.
Neitæ ong haroh ko wa kani ka National Education Policy 2020 toh kawa da wanrah hadien 34 snem naka National Education Policy yong u snem 1986, wei i thmu yong ka hi toh yow rap pynpliah chooh chooh yei e sikai namo ka Education System hapoh ka ri ha ki kyrdan waphær waphær.
Neitæ u Dr. A.L. Dkhar, Principal St. Anthony’s College Shillong won da klam u hajrong ka phang “National Education Policy 2020: Implementation and Challenges for Teachers”.
Ha ka yalang wa pynlai daka Dr. I. Dkhar, Program Coordinator da yoh leh i klam na u Dr. D.G. Lyngdoh, Principal Thomas Jones Synod College Jowai katwa i kyntien khublei na ka G. Lamare, HOD Education Department.
