Ka lyngkhooh snem wa nyngkong yong ka Ryntihlang Village Organisation, Thangbuli da lehkmen ya ka ynne heiwa u Dr. D. Lyngdoh, Block Development Officer, Amlarem C&RD Block da man u kam u kongsan hei emlang u Disuk Tariang, Waheh Chnong ka Thangbuli, u M. Kharpran uwa man u Block Project Manager, kiwa kreh ka Block Mission Management Unit Amlarem wa ki dkhot ki SHG na ki 12 tylli ki Self Help Group.
Kani ka lehkmen da sdang ko da ki kyntien pdiang burom na u Secretary ka Ryntihlang VO wa i rwai. Da khana leh ya ki kaam yong ka VO ha kini ki chi snem wa da lai heiwa da kreh ko leh chirup wa ka dorbar chnong neibynta ka imlang sahlang wei khamtam i yarap ya ki manyung wa duna hei yoh i laa.
U Disuk Tariang da ong u wa daw pteiñ u wow kyrchaan ya ka VO wei wow yahluti ya ki sam chaphrang deiwa e khublei leh ya waroh ki dkhot ki SHG kiwa da wanrah yei kylla ha ka imlang sahlang.
U M. Kharpran da yaroh u ya ka VO wa da em ko ya ki chnat (Sub-Committee) kiwa da wanrah ya i kylla ha kiwa boon ki liang weiwa ka VO da sdang ya ka dei kheiñkor yei manbru iwa kynthup ya i chaniah, i yatylli wa i yakrehlang.
Neiliang u kongsan ha kani ka sngi, u Dr. D. Lyngdoh da khana u ya ki thong yong ka NRLM toh wow pynku ya i yoh i laa ka imlang sahlang wei ki VO toh u kyruiñ ki cha ki kaam wa ye u imja wei ki dkhot won yong ki SHG toh u chimkhia ki wow chah e hikai lyngba ki Skill Training Programmes ki wow ye wow yarap ya ki wow kamai.
Da ong u leh wa ka yung krehkaam yong oo u pteiñ bait ki wow yarap wei wow kyrchaan wei wow yarap ya ki VO.
Ya kani ka lehkmen da pynkut da ki kyntien e khublei na ka B. Pyrngap (MBK Cadre).
