Ka Iahunlang Demthring Village Organization da yoh ko u pynman yei lehkmen dap chi snem ha ka 14 tarik uni u bnai wei kam chibynta ini da pynman yei pynkhooid chnong ha waroh ki dong, wei heijooh i por da yoh ko u saam ya ki Dustbin ha ki 8 tylli ki dong hapoh ka chnong.
Hadien wa dep pynkhooid chnong, ka Iahunlang Demthring Village Organization da yoh won ko u pynemburom ya kani ka sngi deiwa pynman yalang heipor miet ha yung Hall ka chnong Demthring hapoh i pynlai yong ka President wa ka Secretary.
Nyngkong da yoh yei klam na ka President, ka S. Ryngkhlem kawa da pdiang sñiawbha ya ki dkhot ka VO, ki SHG wa ya ki dkhot ka chnong waroh wei da pynbood sa i rwai pdiang sñiawbha na ki dkhot ka VO wa i chaad tynre na ka Rynglang SHG.
Neiliang ka L. Liam da khana ko yei rukom krehkaam yong ka VO wa ka SHG hapoh ka chnong. Neiliang u Waheh Chnong, u S.B. Ryngkhlem da yaroh u yei thmu yong ka VO wow pynkhooid pynpliah ya ka chnong ka thaw, wei heijooh i por da kyntu u ya ki dkhot ka SHG wow man ki kiwa yatoh yumut u kreh ya ki kaam wa bha hapoh ka chnong.
Ha kanni ka jooh ka sngi da yoh leh u pynkhle ya ka Lucky Draw ka VO wei da ah leh ya u Cake dap snem.
