Ki Observer namo kiwa lai sylli bniah yong ka United Democratic Party (UDP) ynne ka sngi da pynsñiaw ki yeiwa khyrngiat ki hajrong i klam u Shemhok Garod uwa man u kyrtong MLA na Raliang Constituency uwa paan Ticket na ka UDP heiwa da kam u ha kini ki sngi wa dadep wa ym em u lai ki Observer cha chnong yong oo wa kiwi ki chnong deiwa pynrap leh wa ini toh i klam kut laad yong oo neibhah wa da sñiawthooh chwa u ya i sur ki paidbah katwa kamtæ da klam u kamni ha katu ka sngi.
“I kam ki Observer da kreh hok i na mynsien wow takit na ki bru chynrang wa kynthai khlem i chah chiliang napyrdi kini ki kyrtong kiwa kynthup ya u Treilang Suchiang uwa man u MDC ka JHADC wa u Shemhok Garod uwa man u MDC warim. Da bichaar wei da e hok i katkam ka sur paidbah wei ym emkaam wow khana i ya u Shemhok wa ya u Treilang wa wan i ha chnong yong ki neibhah lada pyntip i ka takit leh ym man ko kawa khooid,” da ong ki Observer ka UDP.
Chooh chooh da pyntip ki wa ki paidbah ha kiwon kiwon ki chnong ym tipmit ki ya ki wa man ki kam ki Observer wei da leh yeini khnang wow khana hok ki katkam wa man hi.
“Da leh i kam kiwa kylli-ke kam ki bru paidbah wei ymtoh wow lai cha kiwa yahkhmat donhi yong ki kyrtong. I pynlai yumut i wow lai cha ki paidbah wa khian wa nai khnang wow yoh u sñiaw yeiwa ong ki,” da pynche chooh ki Observer.
Heijooh i por da ong ki wa heipor wa wan ha chnong u Shemhok Garod ha Nangbah ha ka 30 tarik u Naikhynde da yachem ya ki bru wei da takit ya ka la’ær wa beh yong u Shemhok wei da kylli leh chaphang u Treilang heiyatoh wa ka Nangbah tangwa neidaw wa tbian ymyoh u kylli na waroh ki bru neibhah wa da hap lai cha kiwi ki chnong ka 3 Raliang Constituency.
Da pyntip ki Observer wa ha katu ka sngi katwa wa yachem bru da chim yukheiñ ya i sur ki paidbah kiwa da khana cheiwon kwah ki wow kyrchaan wei ya kani ka bui na Nangbah da phah noh cha Shillong chwa wow chim ya ka rai neibhah kam kiwa kitkaam ka seiñ kwah ki wow phah ya ka bui kawa katkam wa chem ki na ki paidbah.
Da pynche leh wa wot ya u Waheh Chnong leh da Phone ki yow ye u yachem tangwa ym yoh neidaw wa em u cha skur.
Neiliang ki Observer, da batai ki leh wa ya ka bui da e kti cha ka Election Committee ka UDP West Jaiñtia Hills wei kyrmren skem ki leh wa ka Party daw chim noh ko ya ka rai wow e Ticket hapoh ka 3 Raliang Constituency katkam ka bui wa da e kti khnang wow ye noh ki kyrtong u lai yalap cha kylleiñ ha i pytruid ka Party.
Puræ leh: Pynbna u Shemhok wow yaleh Election bait, kyntait u wa em wa phah yaleh
