Ka Myntdu Pynthorneiñ Farmers Welfare and Producers Organization da yoh ko u saam ynne ka sngi ya u symbe salah uwa da e da u Dr. D. Paswet uwa pait ya ka yung krehkaam ka KVK West Jaiñtia Hills District, Wahiajer cha ki 30 ngut ki warep na chnong Khliehtyrchi wa Mihmyntdu ha Myntdu Pynthorneiñ, West Jaintia Hills District.
Hachwa wa u saam ya uni u symbe salah da yoh yei klam na u Pynchngain Rymbai, President ka seiñ uwa da khana wa neiliang ka yung krehkaam KVK da e ki ya i sikai rep salah neitæ da yoh won i ya uni u salah uwa rap bha symbe, kamtæ kyntu u ya waroh ki warep wa mar ya poi yung u kba pynkhreh won yow rep sa uni u salah khamtam katu wa poi i por rep kba yow man sboh ka hali na ini i rep salah.
Neiliang u Khroo L Pariat uwa e bor e buit ya ka seiñ, da e khublei u ya waroh ki warep kiwa da pynyoo yei ya ryntih, i yatylli i yong ki khamtam iwa da bien ki u pynkylla ya i rukom pyrkhat i yong ki iwa hadien wa dadep ah kba u rep won sa u jhoor sa u salah heipor tlang ha Myntdu Pynthorneiñ. Da pynkynmoo haroh u ya ki warep wa ka sorkar jylla ha ki bnai kiwa da dep da e ko da ka poisa T. 5000 cha ki warep, iwa lada ym tip u pynlai ya ka poisa u lut ko du ha ka chisngi donhi. Katwa kam ki warep sakhiat ha Myntdu Pynthorneiñ yoh ki da u symbe kba, symbe jhoor lyngba i krehkaaam kani ka seiñ kawa yakrehlang waka yung krehkaam Agriculture wa ka KVK WJH, toh u tip u rep u sumaar bha yow rap hoi i manbru longbru, u heh u kmai i rep i riang sam chakhmat, na iwa daw yoh ki u dai ya uni u salah kamwa da dep yoh ki warep u dai ya u kba symbe CAU R1 ha kini ki bnai wa dadep cha ka yung krehkaam ka Agriculture.
Heijooh i por da kyntu chooh chooh u ya waroh ki warep yow pynbha ya ka Tyrchi, ka Syiem Myntdu kawa da kyrkhu ya ki pynthor ki hali lyngba ka um ka sboh ka yong ka, wa kamjooh u lehbha ya iwa da e ka sorkar cha ki warep.
Ha kani ka ya saam salah symbe da yoh ya i klam na u Pyntngen Kyndait, General Secretary ka seiñ uwa da e khublei khamtam ya u Dr. D. Paswet uwa pait ya ka KVK West Jaiñtia.
