Ynne ka sngi ka National Law School University Demand Committee da pynman ko ya ka yalang paidbah ha Khliehriat hapoh ka Auditorium ka Jaiñtia Eastern College kawa da pynlai da u Chairman kani ka Committee u R. Lamar uwa da ban joor wa toh du dei yatylli iwi donhi u yoh yeini i kwah i thrang.
Da ong u hapoh kini ki 50 snem ka sorkar Meghalaya ym em e ko iyi iyi leh ya ka Ri-loom Jaiñtia heiyatoh wa i kaam puræ puthi. Da batai che u wa boon ki laad ki luti deiwa puræ ya ka aiñ wei hapoh India katni em kamwa 24 tylli ki National Law School. Deiwa kdaw leh ya ki muktiar wa pawnaam ka jylla wei ka Ri-loom Jaiñtia da pynmih ko ya kiwa boon ki khloor wa pliah ya ka aiñ wei katni man ko kawa da emkaam bha wow yoh ya kani ka thaw sikai ya ki muktiar.
Neiliang ka Rimaya Manar, ka Principal ka Khadar Daloi Law College, da batai ko ya kiwa boon ki laad ki luti hadien wa da yoh ya ka Law Degree wei man ko kawa em burom hadooh kattæ kattæ wow ye u yarap ya ki bru deiwa e buit e budia, ye u man kam ki Legal Advisers ya ki Corporate Bodies, ye u man kam kiwa bichaar mukotduma wa kiwi tawon ki rukom kreh sorkar wot hadooh kyrdan IAS leh.
U Dr. P. Nongtdu, Principal ka Jaiñtia Eastern College hei klam yong oo da ong u wa kamwa yoo u wa ka Ri Jaiñtia Hills man ko kawa da chah yoobeiñ ha ka jylla yong i. Da pynche chooh chooh u toh ha ki College sorkar ye phi u yoh yei sikai na ki bru kiwa da su kyrpang da ka tulop wa heh, tangwa i su da ka poisa wa pynmih ka College man i iwa khian bha. Ong u leh ka East Jaiñtia Hills District toh kawa dooh bha ka District, wei lada ka sorkar wai ko ya ka laad wow booh ya kani ka College cha ri-loom yong i man ko ka yarap wa khroo bha ya kitu ki bru kiwa wan na ki yung kiwa dooh wa duk.
Neiliang u Deihok Sumer uwa man u Secretary ka FKJGP East Jaiñtia Hills da yaroh u ya ka SFSL kawa da chim ya ka laad u yahluti hei wow dawa na ka sorkar Meghalaya u booh ya kani ka skurbah cha Ri Jaiñtia yong i. Da yaroh u leh ya ka JSM kawa da dawa na ka sorkar ya ka College sorkar ha East Jaiñtia Hills wei yeini toh u dawa hadooh wa yoh.
Neiliang ka Synjuk ki Waheh Chnong ha East Jaiñtia Hills da yoh yei klam na u Cornelius Lyngdoh uwa da kyrchaan pura yeini i dawa wei da e u yarap u da ka poisa neibynta ini i kaam.
U Roitre Dkhar, Secretary JSM da ong u ym phær lada booh ya kani ka National Law School University ha East næ West Jaiñtia Hills leh. Da ong u leh wa nadooh u snem 2015 da dawa wow booh ya ka Engineering College ka NEHU Campus, tangwa khlem mihsoh iyi iyi leh kamtæ ong u toh hok katni u booh ya kani ka Law School University ha Ri-loom Jaiñtia.
Sa uwi tawon u bru paidbah uwa da klam ha kani ka yalang toh u Damewanhi Rymbai uwa da ong wa toh u khut ya ki 7 ngut ki MLA yow dawa ki leh na ka sorkar yeini i angnood ki paidbah kamjooh leh toh u khutlang ya ki 30 ngut ki MDC yow ya ksohkti lang ki.
Da yoh leh yei kyntien kyrchaan ya ini i dawa na u Shwami Ryngkhlem, u dkhot ka KSU East Jaiñtia Hills wa kamjooh leh na u Kerlang Ksoo, President ka Khliehriat Bar Association uwa da noh kyllooid leh T. 5000 cha ka NLSU Demand Committee.
Khaddooh da yoh yei klam e khublei na u J. B. Laloo, Secretary kani ka Demand Committee.
Ha kani ka yalang da wan wow emlang leh da ki bru samen, ki muktiar wa ki seiñbhalang wa kynthup ya ka JSU, FKJGP, JYF, KSU Jaiñtia Hills, Synjuk ki Waheh Chnong East Jaiñtia Hills wa kiwi kiwi.
