Ka National People’s Party (NPP) Nongkrem Block da yoh ko ya kiwa kitkaam wa pura yong ka ynne ka sngi hapoh i yahkhmat u Dasakhiatbha Lamare wei ya kiwa kitkaam wa thymme da wan pynskem da u President ka NPP Meghalaya State, uwa man leh u MP cha Rajya Sabha, u Dr. Wanwei Roy Kharlukhi.
Ha kani ka sngi wot hapyrdi u slap wa ka la’ær wa joor chirup wa i kjam, tangwa ki paidbah da tooid ki wow chimbynta wow ap ya ki heh ka NPP ha ka yalang wa da pynman ha Madan Lad Nongkrem.
Ha kani ka sngi da pdiang sñiawbha leh ya kiwa kitkaam wa thymme cha ka Party kiwa man nachwa leh ki kyrtong MLA wa ki MDC na kiwi ki Party.
Chooh chooh ha kani ka sngi da emlang leh u Montri ka sorkar uwa man u MLA ka Nartiang u Sniawbhalang Dhar, u MLA warim ka Umroi u Ngaitlang Dhar, ki heh wa hakhmat ka NPP wa kiwi kiwi.
Hawa klam ha ka yalang u Dr. Kharlukhi da ong u wa ka NPP daw yoh biang ko yei jop wa boon tam wei daw synchaar ko samen ha ka sorkar hadien ka Election 2023, kamwa da man ha u snem 1972 wa da synchaar du kawi ka seiñ, ka APHLC.
