U Montri Rangbah ka jylla, u Conrad K Sangma ynne da booddien u na ki Deputy Commissioner lyngba ka Video Conferencing hajrong i chah ktah ka jylla na ka Cyclone Sitrang.
U Conrad K Sangma da ong u wa kani ka yalang toh wow tip hadooh katwon iwa chah ktah na kani ka Cyclone wei wow pynkreh ya i rukom kreh wow lai chaphrang. Da kyntu u ya ki Deputy Commissioner wow smat u chna ya iwa da chah ktah wei wow pynpoi ya ki laad yarap kamjooh leh wow ban joor ha ka MeECL wow pyntikna wa smat u pynyoh ya ka bordiñ. Da pyntip u leh wa ya ka poisa yarap namo ka Gratuitous Relief cha kiwa chah ktah daw e katkam ki kyndon ka NDRF.
Ki Deputy Commissioner da pyntip ki yeiwa chah ktah ki yung, ki sarok, ki hali, ki dieñ kwai wa kiwi kiwi. Da pyntip leh wa em i oor khyndaw wa i chlai um ha ki bynta yong ka sor Shillong. Da chah riñ bordiñ ar ngut ha East Khasi Hills wa South Garo Hills.
Da pyntip ki leh wa da e yarap wut-wut cha kiwa da chah ktah wei da sdang wow kreh ya ki bynta wa da oor khyndaw, wow pynkhooid ya ki sarok wei wow wanrah biang ya ka bordiñ cha ki thaw wa da chah ktah.
Neiliang u Director (Distribution) ka MePDCL da khana u yeiwa chah ktah ki chrot bordiñ wa i thut i rukom pynpoi bordiñ wei da pyntip u leh wa kiwa kreh ka MeECL da em ki ha madan wow pynbiang yeiwa emkaam wei dang em hi i pynthut u slap waka la-ær ha ki kattu katni ki thaw.
