Kiwa yahkmat ka KSU Wapung Unit da lai booh dorkhat ki ha yung krehkaam u DC ka East Jaiñtia Hills ynnin ka sngi yow pynkynmoo yei tkoh i rukom krehkaam ka MeECL Khliehriat Division, Moowakhu heiyatoh i dawa pynyoh Transformer.
Ka seiñ da pyntip ko wa ka chnong Wapung Skur nadooh u snem 2020 da dawa ko wow pynyoh ya u Transformer wei da phylla leh yei slem wot hadien u MLA ka thaaiñ, u Kyrmen Shylla da kular u wow pynyoh Transformer la ar snem kattu.
I daw wa dawa Transformer toh wa da chem chitom palat ki paidbah neidaw wa duna Voltage hadooh wym ye de u pynemkaam ya ki tiar ki tar wa emkaam bordiñ heipor miet khamtam ha Dong Moopynieiñ.
Kamtæ ka seiñ da pynkynmoo ko leh ya u DC yei dawa ya ka Sub-Station ha ka chnong Wapung wei da kyrpaad ya oo wow chimkhia u ya ini i dawa ka seiñ.
