U Montri Rangbah ka jylla, u Conrad K Sangma, ynne da pynkup burom u ya kiwa seiñ khih ha ka yalang wa da e pyrtuid ‘Meghalaya Celebrating Entrepreneurs’ wa da pynman ha State Convention Centre, Shillong kawa da wan wow embynta lang da ka Country Program Officer, IFAD, ka Meera Mishra.
Hawa e yei klam, u Conrad da ong u wa kiwa boon ki kaam wa da pynkreh hapoh ka jylla neibynta ki khynroo, ki kynthai, ki warep wa kiwa seiñ khih toh dei thmu wow pyman ya ka Meghalaya kam kawi na ki jylla wa bha tam hapoh ka ri wei yeini ym ye u leh lada ym pynku yei yoh i kot kiwa em na tre dooh.
Da ong u leh wa ki warep kiwa em cha ki thaaiñ palatsor kamjooh kiwa seiñ khih emkaam ki yei yarap wow pynwandur yei rukom kreh ki wei da em leh kiwa boon ki Integrated Village Cooperative Societies, ki Producers’ Groups wa kiwi de kiwa da yoh myntoi na kini waroh.
Chooh chooh da ong u wa kiwa seiñ khih toh kiwa emkaam bha kiwa em ha waroh ki kyrdan nadooh wow kit ya ki mar, u lai dai ya ki mar wei ka sorkar toh kawa yarap wow wai ki laad tangwa yow pynlai won chong i ha ki bru.
Da kdaw u leh ya ki kaam wa yatoh wa i uiñke suwari kawa daw pynyoh kreh ya kiwa boon ha ki snem wow wan kamjooh leh ki kaam IT.
U Conrad da saam u leh ya ki Cheque cha kiwa chah jied kam ki Best Producer Groups, Best Integrated Village Cooperative Societies, Best Collecting Centers, Best Ginger Processing Units wei da pynlait u leh ya ka poisa hapoh ka Meghalaya Ateliers Program kam chibynta ka Meghalayan Age neibynta kiwa chna tiar wa kiwa chet, heijooh i por da pynlait leh ya ka poisa hapoh ka Homestay Scheme ka chnat Tourism.
