Kam chibynta i dap 50 snem ka jylla, u Montri ka sorkar, u Sanbor Shullai da pynkup burom u ya ki kattu katni ki bru wa kreh neibynta ka imlang sahlang wei kam chibynta yong ini, ynnin ka sngi da booh ya u motdur u (L) Dhyanada Charan Sharma ya uwa jooh khut maya kam u Bah Dhan ha Kench’s Trace, Shillong chirup i krehlang wa ka Raid Laban Sports, Social & Cultural Organization.
Kiwa klam ha kani ka sngi kynthup ki ya u (Rtd) Air Comdr. Iqubal Hussain Hazarika, u Dr. V. K. Mishra Director, ICAR, Umiam, u Shantanu Pujari, Chairman AIDC, ka Krishna Dasgupta na AIR Shillong wa u Jayanta Sharma heiwa da kynmoo ki ya ki kaam wa da leh u Bah Dhan.
Neiliang u Sanbor da khana u ya i daw wa booh ya uni u motdur deiwa ong wa emkaam wow pynkynmoo ya ka juk wa katni yeiwa da leh da ki bru waheh kiwa nachwa. Da ban joor u leh hajrong i emkaam wow im salonsar khlem ñiaw chilliang iwi ya iwi deiwa kynmoo leh ya ki kaam wa da leh u Sharma ya ki jaitbru waphær waphær.
Da ong u wa u Sharma da chakri u ya ka imlang sahlang nadooh u 1947 khamtam wow yoh ya i thaw wow chna ya ka Civil Hospital hadooh wa pynlait ka Cantonment Head Quarter ya ini i thaw hadien wa pynsñiaw u yeini ha u Montri Rangbahdooh warim ka ri, u Pandit Nehru, ha Delhi.
Chooh chooh da khana u wa u Sharma toh uwi na kiwa chimkhia wow sdang ya ka Electric Crematorium ha Shillong wei da embynta u wa ka Laban Namghar, Shillong palat 70 snem wei da man u leh kam u President yong ka palat 20 snem.
U Sharma da embynta u leh wa ka Shri Arabindo Institute of Cultural Centre, ka thaw ri khynnah ha Hindu Mission, ka Central Puja Committee, ka Vivekananda Kendra wa kiwi kiwi hadooh wa dap u 90 snem i rta.
Ya uni u motdur da chna ha Krishnanagar, West Bengal da ki bru chemphang heiwa u Sanbor da lai u leh cha ini i thaw ar sien wow booddien ya ini i kreh. Uni u mot leh man u uwa nyngkong yong ki bru Assamese wow pynyieñ ha ki thaw paidbah ha Shillong.
