Ka yung krehkaam u Deputy Commissioner, West Jaiñtia Hills District, Jowai chirup waka yung krehkaam u District Sports Officer deilang waka District Sports Promotion Society ynne i step da pynman ki ya ka Run For Unity kam chibynta ka National Unity Day Rashtriya Ekta Diwas kawa man leh ka sngikha u Sardar Vallabhai Patel uwa da wanrah yei yatylli hapoh ka ri.
Ya kani ka yaphet da sdang na Kiang Nangbah Stadium deiwa lai lyngba ka Ladthadlaboh Main Road- Kiang Nangbah Government College-By Pass warim- Yingkieñ Myntdu-Police Point-New Hill- Ladthadlaboh Main Road wei da pynkut ha Kiang Nangbah Stadium.
Da wan wow kaweh lama ya kani ka Run for Unity da u ADC ka West Jaiñtia Hills, u PK Boro deiwa emlang ki dkhot ka WJDSA wei da chimbynta lang leh wow chim ya ka smai Rashtriya Ekta Diwas da waroh kiwa chimbynta.
Ha ki chynrang yei naam jop da yoh u Dasaman Kyndait uwa da pyndep yei phet deiwa chimpor 27 minit wa 56 second, wa ar da yoh u Dabit Dkhar uwa da pyndep heipor wa 28 minit wa 15 second katwa hei wa le da yoh u Teiboklang Biam uwa da pyndep heipor wa 28 minit wa 34 second wei kini waroh toh kiwa na ka chnong Sabahmuswang.
Ha ki kynthai won da jop ka Levina Papiah kawa na chnong Mustem kawa da pyndep yei phet heipor wa 38 minit wa 28 second, wa ar da yoh ka Happiness Phawa kawa da pyndep heipor wa 39 minit wa 24 second kawa na Sabahmuswang katwa hei wa le da yoh ka Ribity Sana kawa da pyndep heipor wa 43 minit wa 18 second kawa na chnong Pynthorsale.
