U General Secretary ka Hynniewtrep Youth Council, u Roykupar Synrem da khyrwit u deiwa eh ya ka sorkar hajrong ki 9 tylli ki phang wa ka Save Hynniewtrep Mission da booh ko wow dawa na ka sorkar.
Hawa klam cha ki dkhot yong ki seiñbhalang hapoh ka Save Hynniewtrep Mission, da kylli u hajrong i pynkrehkaam ya ka kyndon 144 Cr.PC wow khanglaad ya ki seiñbhalang wow yakhih, wei da ong leh wa nadooh ynnu emkaam wow yoh bor na ka DC wow yachem pyn ya kiwa mihkhmat yong i, hawa ya kiwa mihkhmat da jied da ki paidbah.
Da ong u wa em i pyrchang wow khanglaad ya ki seiñbhalang wow pynyoo ya ki phang dawa tangwa ynne da man ka sngi wa jop.
Uwa yahkhmat ka HYC da ong chooh chooh u wa kwah u wow klam da iwa che wa lada kiwa chna aiñ u pynkrehkaam ki ya ki aiñ lym kamtæ ki seiñbhalang daw mih hi ki chakhmat wow pynkrehkaam ya ki aiñ, wei neini chakhmat daw kylli ha man ki yalang yong u Montri Rangbah, cheiwon wiar ka Resolution ILP wei wow tipmit noh ya ka ktien Khasi.
U Roy da ong kylli u leh na ka sorkar iyi jia ya ki kaam baam-tooh, ileh ym pynchitom ya ki pulit wa pynyap ya u Cherishstarfield Thangkhiew, ileh wa ka Reservation Policy man ko kawa noh chiliang, wei da dawa leh wow wanrah ya ka aiñ wow pyndam syndon ya ka aiñ yakhle kamwa da khlai ktien da ka sorkar wei kamjooh leh wa ka sorkar toh u chna laad ko wow yoh kaam ki tre jylla ha waroh ki bynta neibhah da wan kjit da ki bru wa na baar, najrong wa ka sorkar toh u pyndap noh ko da ki khynroo ha waroh ki kaam wa lait ha ki chnat sorkar.
