U Robertjune Kharjahrin uwi na kiwa yahkhmat ka Save Hynniewtrep Mission da ong u wa lada ya u pulit wa baam-tooh ye wow kem, neiyi i daw wym kem ya ki Montri sorkar.
Ki dkhot seiñbhalang hapoh ka Save Hynniewtrep Mission da yachem ki ya u Symbood Montri Rangbah ka jylla, u Prestone Tynsong wow dawa na ka sorkar wow pynbna paidbah noh ya ka takit hajrong ki kaam wa bakla hapoh ka MeECL, wa kynthup nadooh i pynkrehkaam ya ki Smart Meter wa ka Saubhagya Scheme.
Da ong u wa neiliang u Prestone uwa pait ya ka chnat Bordiñ da kular ko wow booh yeiwa chem ka takit ha ki rynsaan paidbah.
Heiyatoh won wa i pynbaad baam-tooh hapoh ka chnat Social Welfare, da ong u wa i takit hajrong ini leh daw booh paidbah noh.
Hajrong ini, u Robert da ong u wa hadien wa puræ bniah ya kini waroh neiliang yong ki leh ym yohsa ki wow yakhun noh da ka mukotduma Public Interest Litigation (PIL), deiwa pynrap wa lada ya u pulit uwa pynemkaam bakla ya ka poisa ye wow kem weileh ym ye u kem ya ki Montri.
