Ka Synjuk Seng Rangbah Katholik Parish Namdong hei yahkhmat u Karlic Siangshai kam u President chirup i emlang u Vice President, u Buromlang Dhar, u Fr. Dominic Kympat, Parish Priest Namdong Parish uwa man leh u Director ka Synjuk Seng Rangbah Katholik Parish Namdong, u Piius Ksoo, Finance Secretary, u Riban Khongshei, General Secretary Seng Rangbah, u Chavit Sariang wa kiwi, ynnin ka 3 tarik da lai e yarap ki ya ka thaw sumaar wa kyrpang ya ki bru wa ngop hei dih pynmuaid ha St. Missionary Sisters of Mary Help of Christians wa em ha Dong ka Lwet Ialong, West Jaiñtia Hills District.
Kam ka thaw e sumaar wa dang lai luti dang ar snem hapoh i pait i pynlai ki Sister, da ong wa dang em ko chiboon i duna, neitæ i daw da pynman yaka Synjuk Seng Rangbah u lai e yarap. I yarap wa da e ki ha kani ka sngi kynthup ya u khoo 5 churia najrong kiwi ki marbaam deilang waka poisa.
Neiliang ka Sister wa pait ya kani ka thaw sumaar da khana ko yei eh wa chem ki wa kynthup ya u sarok, ka umbaam umdih, i wym em bordiñ wa kiwi kiwi.
Neiliang ka Synjuk Seng Rangbah Katholik Parish Namdong, ha kani ka sngi da e ko yei syllok ya ki bru wa sah ha kani ka thaw heiwa u Fr. Dominic Kympat da e u yei kyrkhu kyrdoh.
U Karlic Siangshai hawa e yei klam da kyntu u ya ki dkhot ka Balang Katholik wow noh ki yei yarap cha kani ki thaw e sumaar kawa dang emkaam chiboon i yarap khamtam neibynta u sumaar ya ki bru.
Heijooh i por kyntu u leh ya ki bru kiwa da kwah u lait nei chah kdoh chah khoom hei kyiad wa u drug wow kyruiñ ki cha ki Sister wa em ha kani ka thaw kiwa e i chakri doh wa mynsien neibynta i bha yong ki hi la ki chynrang næ kynthai.
