U Montri ka sorkar pyrdi wa pait ya ka Scheme Jal Shakti, u Gajendra Singh Shekhawat, da yaroh u ya ka jylla Meghalaya kam kawa chba charak ya kiwi won ki jylla yong ka ri hawa pynkrehkaam ya ka Scheme Jal Jeevan Mission (JJM). Ha i wan yooh kjat u Montri cha ka jylla, da yaroh u yei ye ka jylla wow pynemkaam hok ya kani ka Scheme kawa daw yarap chiboon ki manyung ha ka jylla.
Hawa sdang ya ka JJM ha u Naisaphra 2019, da em du 4,550 tylli ki manyung ha ki thaaiñ khapsor kiwa yoh umkor hadooh ha thlu yung. Katni da yoh wow pynbiang um ha yung hadooh ym duna 2.61 lak tylli ki manyung.
“Deiwa em hadooh 41.5% i ku i ye wow saam um cha yung, ka jylla Meghalaya da tam ko yei yukheiñ ha kiwi won ki jylla yong ka ri iwa man du 36%, iwa pynman ya ka Meghalaya kam ka nongmuna namo ka Role Model ya kiwi ki jylla wa pynemkaam hok ya ka Scheme JJM. Nga ngait skem O wa ka jylla Meghalaya daw ye ko wow pynbiang umbaam lyngba ki kor um ha man ki thlu yung ha ka jylla chwa wow kut i por,”da ong u Shekawat.
“Du ka jylla Meghalaya kawa da poi cha ka thong ‘Performance Incentive Grant Under JJM’ nei bynta ar snem khlem dooh.” Katkam wa ong u Shekhawat, ka Meghalaya toh leh kawi ka jylla kawa ye wow pynyoh sakhait ya ka um kawa paka wei da khana u leh wa kamwa T. 700 klur daw pynkrehkaam wow chna hadooh kamwa 2500 tylli ki nan um.
Hawa klam hajrong i sakhi wei paitbniah u Shekhawat, u Montri Rangbah ka jylla u Conrad K Sangma da ong u, “Ka jylla Meghalaya dang pyrchang ko wow pynkrehkaam hok katwa ye khnang wow ye u e myntoi ya kiwa boon. I e khublei i ya u Gajendra Singh Shekhawat neibynta wa smat u wow yarap u pynkrehkaam ya kani ka Scheme. Ki kyntien pynchlur yong oo da man sakhiat kiwa e mynsien ya i wow nang kreh chitom chooh chooh wow pynpaka ya kani ka Scheme ‘Jal Jeevan’ wow pynbiang chooh chooh ya waroh ki manyung ha ka jylla wei ym chong kli-kti khlem da pynmih sakhiat ya ki soh wa thiang neibynta wow yoh rah biang yei naam ha ka sien kawa le. U pyrshang wow yoh 100% i pynkrehkaam ya waroh ki yung ha ka jylla.”
Kam wow pynkynmoo, ka President ka ri India, ka Droupadi Murmu da pynkup burom ko ya ka Meghalaya neibynta i ye wow pynkrehkaam paka ya ka JJM ha ka ri waroh kawi. Ha ka Scheme ‘Har Ghar Jal’ (HGJ), ka Meghalaya da yoh ko rap hakhmat ya ka Assam, J&K, Kerala, Manipur, Nagaland, Rajasthan, Sikkim, Tripura, Uttarakhand, Karnataka, Goa wa kiwi kiwi ki jylla ka ri. Ka Meghalaya da yoh ko ya ka HGJ Status neibynta ki 597 tylli ki chnong wa kiwi de hadooh 1500 tylli ki chnong wow pynpoi umkor 100% cha ki yung ki sem.
