Ka pynsñiawthooh wow pynkupbor ya ki kynthai namo ka Awareness Rally on Women Empowerment da pynman ya ka ynne ka sngi da ka yung krehkaam ka District Library Jowai, Arts & Culture Department chirup wa ka Raja Ram Mohan Roy Library Foundation hapoh yong ka Ministry of Culture ka sorkar India.
Kani ka Rally toh chibynta yong i lehkmen ya ka lyngkhooh snem wa 250 ka sngikha u Raja Ram Mohan Roy uwa tip leh kam u Father of Modern India.
Ha kani ka sngi u Deputy Commissioner ka District, u B.S. Sohliya, da man u kam u kongsan heiwa da kaweh lama u leh ya kani ka Rally na pchem ka District Library heiwa da chimbynta da kiwa sikai wa ki khynnah na kylleiñ ka Jowai chirup wa ki NCC wa ka MBS&G deiwa rah leh ya ki kot rben wa thoh ya ki kyntien wow pynkupbor ya ki kynthai.
U DC da ong u wa emkaam bha wow pynman ya ki kynthai wow ryngkat ki wa ki chynrang neibhah hadooh katni dang em ki kaam wa man pyrchah ya ki wa ki khynnah wot hadooh wow yoh yei puræ puthi.
Da ong u wa da toh i por wa i pynkupbor ya ki kynthai u man iwa sakhiat wei ymtoh wow man kiwa pait donhi tæ suki yeiwa jia ki kaam wa chah yoobeiñ wei chah lehbeiñ ki kynthai wa ki khynnah.
Chooh chooh da kyntu u ya ki khynnah wow yieñ wei wow pyntip cha ki bor District namo ki bor chnong lada yoo ki kam kitæ ki kaam.
Neiliang u Terrence Sawian, uwa pynlai ya ka yalang da khana u ya ki kaam wa da leh u Raja Ram Mahon Roy yow pyndooh ya i pynchongkurim dang khynnah, ka Sati wa i em kurim boon ngut hapoh ka ri.
Ya ki kyntien pdiang burom ynne da e da u W. Gassah, District Librarian, Jowai.
