U Montri ka chnat Puræ Puthi, u Lahkmen Rymbui da pyntip u wa ka sorkar da pynlait ko ya ka poisa bai baam namo ka Scholarship ki khynnah puræ Pre wa Post Matric kawa kynjoh T. 169 klur neibynta ki 61,116 ngut ki khynnah ka jylla kawa yong u snem 2021-22.
Da ong u wa kani ka poisa daw pynpoi cha ki Account yong ki khynnah wa toh hok wow yoh lyngba ka Public Financial Management System (PMFS).
Hawa kylli ya i daw wa slem wow pynlait ya kani ka poisa, u Lahkmen da ong u wa ka Scholarship toh kawa da e poisa 90% na ka sorkar India, wei haap yang hadooh wa da pynlait chwa na ka sorkar pyrdi khnang wow ye ka sorkar jylla u pynlait ya ka 10%.
