Ki dkhot ka Hynniewtrep Youth Council (HYC) da mih ki wow pynman syndet ya ka yakhih Save Hynniewtrep Mission hakhmat yong ka Shillong Civil Hospital wot hapyrdi wa ki bor pynlai District da pynkrehkaam ki ya ka kyndon Section 144 CrPC ha waroh kawi ka nongbah Shillong.
Ki dkhot ka HYC ha kani ka yakhih da kbai ki ya ki phang wa ki da booh ki hapoh ka Save Hynniewtrep Mission, wa kynthup ya ka ILP wa i tipmit ya ka ktien Khasi wei u yakhih ki hadooh wa yoh, najrong kini da dawa leh wow pynbait thymme ya ka Reservation Policy, wow kyrriah noh smat ya ki Kharmator wa kiwi kiwi ki phang.
Hapyrdi i pynkrehkaam ya ka Section 144 CrPC, ki dkhot ka HYC da toor ki leh chakhmat ki Moopynyieñ ha IGP katwa ki pulit hap ki wow pait ya kini kiwa em kamwa 20 ngut wa ym toor chadooh ka Secretariat.
Neiliang u General Secretary ka HYC, u Roykupar Synrem da ong u wa ini i yakhih wa syndet yong ka seiñ toh wow beiñ yei leh embor ki pulit wa ki bor pynlai District ya ki dkhot ka seiñ ha Rambrai katwa ki dang pynman ki yei yakhih.
Da ong u wa ka seiñ ym kynrandien ko nei pyntieñ ka sorkar deiwa pynkrehkaam da ka Section 144 tangwa daw pynjoor yei yakhih. Da ong chooh chooh wa ka sorkar MDA wa yahkhmat da u Conrad Sangma da pyrchang ko wow synchaar embor, wei uni uwa yahkhmat ka HYC da e pyrtuid u ya kani ka sorkar u Conrad da ka Meghalaya Dictatorship Alliance ym toh de da ka Meghalaya Democratic Alliance.
