Ka Meghalaya Bharat Scouts & Guides, West Jaiñtia Hills kam chibynta ka dak yong i kynmoo warom yei lai luti wa 73 tylli ki snem ka seiñ watip kam ka Foundation Day, ynne ka 11 tarik da pynman ki i yachemlang wa kyrpang ha District Headquarter, Jowai.
Ha ka yalang wa pynlai da u Adiam U Bthuh, District Secretary MBS&G-West Jaiñtia Hills katkam ka rukom dustur yong ka Bharat Scouts & Guides, ki dkhot da chimbynta ki wow rwai ya ka Prayer Song wei da pynkut won ya kani ka yachemlang dei rwai ya ka National Anthem.
Ha kani ka yalang najrong ki Scouts-Guides, Rovers-Rangers wa ki Unit Leaders dawan embyntalang leh da ka S. Tariang, Vice-President, MBS&G-West Jaiñtia Hills kam ka kongsan wa u D.E. Pariat, Principal Lissi Pearl Secondary School Mukhla kam u symbood kongsan dei emlang leh ka Rosie Bang, DOC (G) wa u Carefully Gassah, DOC(S).
U D.E. Pariat hawa klam da pynkynmoo u yei man kyrpang kani ka sngi wei da kyrsu kyntu u ya ki para dkhot wow chim ki i kitkhlieh hei wow leh yeiwa bha tam neibynta ka imlang sahlang yong ka ri waka jaitbru.
Ka S. Tariang hawa e kyntien da ong ko hawa chim wow kynmoo burom ya ka Foundation Day man ko leh ka por wow kynmoo burom i leh ya uwa seiñ wa sdang ya ka Scout & Guides Movement, u Lord Baden Powel wa kiwi kiwa yahkhmat yong ka Movement wa em ha ka ri wa ka jylla.
Chooh chooh da pynkynmoo ko leh ya ki para dkhot ya ki yurim krehkaam ka Movement wa ki kaamram watoh u leh katkam wa da chim kular wow chakri ya ki parabru dei sñiaw maya, sñiawburom khlem da booh næ wanrah i sñiawyaphær.
Khaddooh chwa wow poi cha wakut yong i yachemlang da em i pynlait ya ki 73rd Foundation Day Sticker wa i pynkup burom ya ki Unit Leader kiwa da yoh yei naam Best Scouts Master-Best Guides Captain.
