U Montri Rangbah ka Meghalaya, u Conrad K Sangma, ynne da wai u ya ka Rongjeng Civil Sub-Division ha East Garo Hills deiwa emlang u Deputy Speaker, u Timothy D Shira, ki MLA u Jim Sangma, u Thomas A Sangma, u Brening Sangma, u Rupert Momin wa u Pongseng Marak.
I dawa ya kani ka Rongjeng Civil Sub-Division toh iwa la 40 snem. Ha u 2017 da chna da ka Administrative Unit ha Rongjeng, heiwa ynne da pynku kyrdan cha ka Civil Sub-Division deiwa pynbna leh da u Lat ka jylla.
Ha kani ka Sub-Division wa thymme daw em kamwa 180 tylli ki chnong wei da man ko leh ka nyngkong dooh ka Civil Sub-Divison ha East Garo Hills.
Hawa e yei klam, u Jim Sangma da pynsñiaw u yei sñiawngooh ya u Montri Rangbah wa da pynmankaam u yei angnood ki paidbah kiwa da yang da slem yeini. Da yaroh u leh ya u Montri Rangbah wa da pynmankaam u leh yeini i angnood yong u (L) Purno Sangma uwa da yaleh bha wow dawa ya kani ka Rongjeng Civil Sub Division.
U Conrad hawa wai ya u mooyurim, da e kti u leh yei pynbna (Notification) cha u SDO (C) wa thymme, u Reuben Momin wei da e khublei u leh ya ki paidbah ka thaaiñ yei mih ki deiwa boon ha kani ka sngi wow sahkynmoo.
Da ong u leh wa ka sorkar MDA kreh ko wow wanrah ya ki bru chajan waka sorkar wei daw pynku kyrdan ya kiwa boon ki Block wa ki Sub-Division yow yoh myntoi ki paidbah.
