U Montri ka sorkar pyrdi wa pait ya ka Road Transport and Highways, u Nitin Gadkari ynnin ka sngi da pynbna u ya ki kreh wa thymme wa da poi T. 1.6 lak klur neibynta ka North East waroh kawi.
Hawa pynbna yeini hadien ka yalang wow booddien yei pynkreh ya ki kaam ka Ministry ha ka thaaiñ North East, u Montri da pynbna u wa ki kreh wa thymme u kynthup ki nadooh ki sarok, ki, Ropeways, ki yingkieñ khian wa ka yingkieñ heh najrong ka wah Brahmaputra wa kiwi ki wah.
U Gadkari da pyntip u leh wa ki Multi Modal Logistics Parks da em i thmu wow booh ki ha Tripura wa ha Silchar, Assam.
Daw booh leh ya 50 tylli ki Way Side Amenities kiwa man kam ki thaw baam ha rood sarok deilang wa kiwi ki dukan wei daw pynchna ya 50 tylli ki View Point wei manda pynchna ya kini waroh daw yarap ko ya ki kaam uiñke suwari hapoh ka North East, da ong u.
Neibynta ka Meghalaya ha kini ki kreh wa thymme da pynbna u wow chna 616 Km u sarok wa 10 tylli ki yingkieñ kiwa waroh dapoi T. 12,575 klur.
Iwa boon dooh i wow chna sarok toh ha Arunachal Pradesh heiwa daw chna 2900 Km, 4 tylli ki Ropeway wa 6 tylli ki yingkieñ hei lut wa T. 45,839 klur.
Da pyntip u leh wa da dep wow chna 350 Km u sarok ha Meghalaya hei dor wa T. 2,480 klur wei dang sah sa 281 Km kiwa dang chna kiwa T. 3,819 klur i kreh wei wei deilang wa kini wa kiwa thymme dapoi T. 18,799 klur neibynta ka Meghalaya.
Ki sarok wa da pynbna u ha Meghalaya toh ka Shillong-Western Bypass kawa jrong 38 Km heidor wa T. 2205 klur yow pynsuk ya ki kari wa wan na Guwahati yow lai cha Shillong.
Ka Dainadubi-Darugre-Williamnagar wa jrong 80 Km hei lut wa T. 4350 Km kawa man leh yow suk u chalan mooyong.
Ka Mawlyngkhung-Mawryngkneng (Shillong Eastern Bypass), Mawryngkneng-West Jaiñtia Hills wa Jowai Bypass kiwa deilang dapoi 75 Km i jrong hei lut wa T. 4100 klur.
Ka sorok Paikan-Tura wa jrong 56 Km hei lut wa T. 1827 klur.
