Ka Assam da pteiñ ko wow tam hei boon yoh takma ha ka 2nd North East Olympic Games 2022, deiwa yoh 49 tylli ki takma ksiar hadooh ynne i miet.
Da em boon ki yalehke wa pyndep mynstep kawa man leh ka sngi khaddooh.
Ka Manipur kawa man kam kawa jop dooh ha u 2018, da em ko hei wa ar deiwa yoh 45 tylli ki takma ksiar, ka Arunachal Pradesh 31 tylli katwa ka Meghalaya 20 tylli iwa da man awjan 7 chah ya iwa da yoh ko soo snem nachwa.
Ynne da sdang leh ya ka Karate heiwa ka Arunachal Pradesh da yoh ko 3 tylli ki takma ksiar, 1 takma rupa wa 1 takma tama. Ka Assam da yoh ko iwi i ksiar, rupa wa tama katwa ka Meghalaya da yoh ko 1 takma ksiar wa 2 tylli ki takma tama.
Ka Sikkim ym pu em yoh takma ksiar ko hadooh ynne, heiwa da yoh ko 1 takma rupa wa 2 tylli ki takma tama iwa jooh kamwa yoh ka Mizoram. Ka Manipur won da yoh ko 1 i takma rupa wa 1 takma tama katwa ka Nagaland da yoh ko 1 i takma tama, wei dang em leh boon ki takma kiwa daw saam mynstep.
