Ka yakob yah Cycle wa tip kam ka Road Cycling Road nadooh na Shillong cha Mawthadraishan Peak da pynman ynne ka snig kam chibynta ka 2nd North East Olympic Games 2022, heiwa ka Manipur da jop ko ha ki yong ki chynrang wa ki kynthai.
Kani ka yakob yah Cycle toh kawa jngai 80 Km wei da man ko leh du kani ka yakob wa da pynman cha baar ka Shillong heiwa kiwa yah Cycle da yoh ki ya ka step wa khooid wa pynngaad kamjooh u sarok wa bha.
Ha kani ka yakob wa pynyoo yei khlanbor, u Konthoujam Bishan Singh na Manipur da pyndep u yeini heipor wa 2 kynta, 28 minit wa 25 second yow jop ya ka takma ksiar ha ki chynrang. Hei wa ar da bood da u Tajum Dere na Arunachal Pradesh uwa da pyndep heipor wa 2:29:19, katwa u yong ka Meghalaya, u Kevinjohn Khyllait da yoh takma tama u deiwa pyndep heipor wa 2:30:45.
Hei yong ki kynthai won da jop da ka yong ka Manipur, ka Naorem B Devi (2:57:18). Ka Arunachal da yoh takma ksiar biang ko lyngba ka Lindum Kia Kia (3:01:56), wei ka Manipur da yoh takma tama ko lyngba ka Thokchom Helen Devi (3:04:55).
