U MLA ka Jowai, u Wailadmiki Shylla ynne da wai u yei trep wow kset namo ka Conservancy Truck Shed ya ki Truck kit jhep deilang waka JCB wa ka kari tylliat jhep namo ka Refuse Compactor ka Jowai Municipal Board (JMB), wa em ha pchem ka yung krehkaam ka Jowai Municipal Board ynne deiwa emlang u DC, u B.S. Sohliya, u Chairman ka Jaiñtia Hills Autonomous District Council (JHADC), u Dr. Sankey Shangpung, u Chairman ka Jowai Municipal Board, u Lasoki Lakiang waka CEO ka Jowai Municipal Board, ka B. Blah, ki MDC, ki waheh chnong wa kiwi de.
Ya kani ka Conservancy Truck Shed da chna hapoh ka Grant in Aid Capital Asset 2020-2021, ya ka JCB waka Refuse Compactor da yoh poisa hapoh ka 15th Finance Commission 2020-2021 waka CC Flooring hapoh ka 14th Finance Commission 2020-2021. Kini waroh dapoi ki T. 1,13,000,00.
U Wailadmiki hawa e yei klam da yaroh u ya ka Jowai Municipal Board yei kreh chitom ko khamtam heipor wa em ka khlam. Da klam u leh yei emkaam wow pynman ya ka chnong Jowai kawa khooid, heiwa da dep thied wei da saam ya ki thaw pynlang jhep cha ki manyung yow suk u yabhah yei jhep hapyrdi kiwa pyut wa ki wym pyut deiwa kyntu ya kiwa chong chnong ka Jowai wow ya krehlang.
Neiliang u DC da klam u yei por wa jooh man u kam u CEO ka Shillong Municipal Board deiwa ong wa i kaam ym toh iwa suk, tangwa iwa emkaam dooh toh wow kylla noh yei rukom pyrkhat wei wow ya krehlang yow man kiwa leh khooid. Wei ini emkaam wow sdang na yung na sem deiwa pynduna leh yei jhep wa pynmih i.
Neiliang ka B. Blah da khana ko wa ka Jowai Municipal Board ym du wow pynlang ko yei jhep tangwa da kreh ko leh wow wanrah ya ki kaam pynroi wei hapoh ka 14th Finance Commission, ka JMB da chna ko ya u sarok wow lai na Wahnangbah cha Iawmusiang, wei hapoh ka 15th Finance Commission Award Basic Grant, da yoh 24 tylli ki Work Order wa da e cha kiwa boon ki dong heiwa da pyndep 17 tylli. Heiyatoh wow chna paikhana ha ki yung hapoh ka Individual Household Toilets (IHHL), da e Work Order cha ki 74 tylli heiwa da dep chna 57 tylli. Ki Work Order wa thymme wa em 7 tylli, hei dor wa T. 12,000 leh da pynlait.
Daw chna leh ya ka In-Situ Nallah Treatment namo wow pynkhooid ya ki dooid wa kai wa em 11 tylli kiwa mih na kiwa boon ki dong kiwa lai bait cha ka wah Myndtu.
Da khana ko leh wa da pynkrehkaam ya ki Welfare Scheme lyngba ka DAY-NULM deiwa sdang ya ki SHG kiwa da yoh yarap poisa T. 10,000, ka yarap seiñ khih wa da em 30 ngut kiwa yoh myntoi deiwa yoh ya ka ram kawa T. 2 lak samen. I yarap ya kiwa chongdai cha rood sarok hapoh ka PM Svanidhi Scheme wa em 30 ngut kiwa yoh myntoi heiwa da pynlait ya bhah wa nyngkong ka ram kawa T. 10,000 samen. Chooh chooh da ong ko wa ka Jowai Municipal da pynman ko yei pynsñiawthooh ha waroh ki dong ka chnong Jowai wa ha ki 17 tylli ki skur wei daw pteiñ leh yeini ha ki thaw wa pynman yaw.
Kiwa embynta ha ka thong krehkaam wa tip kam ka “Keep Jowai Town Clean” wa kynthup ya ka Society for Urban and Rural Empowerment, Young Minds Collective (YMC), Bharat Scout and Guide, Synjuk ki Waheh Chnong da pynkup burom ya ki da ki Memento wa ki Certificate yow tipmit yei kreh chitom ki.
Da saam leh ya ki thaw pynlang jhep cha ki skur wa ki College.
Neiliang u L. Lakiang wa u Dr. Sankey Shangpung leh da klam ki yei emkaam yei khooid wa i rukom pynlang jhep yow pynman ya ka chnong Jowai kawa khooid.
