Ka KSU Laban Circle ynnin ka 16 tarik da yachem ko ya u Sanbor Shullai, MLA South Shillong Constituency wa u Ricky Shullai, MDC warim ka Laban Constituency wow yaklam hajrong i emkaam ka thaaiñ Laban Pyllun.
Ki mat wa da yaklam toh hajrong i wan psiah ki bru wa na baar hapoh ka thaaiñ wa ki laad kammon wow khoom yeini deiwa krehlang wa ki pulit wa ki heh ka chnong.
Da yaklam leh yei emkaam ya ka Rehabilitation Centre kawa biang wow em ki Counsellor wow saar ya kiwa pynemkaam ya ki jait dih pynmuaid.
Hajrong ki ar tylli ki sarok wa da pynkylla pyrtuid da ka Naming Committee ka sorkar jylla kitæ u “Ardhendhu Choudhary Road” ha u snem 2020 kawa em ha Dorbar Chnong Laban wa ka “Bhaskar Choudhary Road” ha u snem 2022 kawa em leh ha Dorbar Chnong Laban. Heiwa nadooh ka sngi nyngkong ka seiñ ym sñiaw yahaap ko ya ini wow pyrtuid sarok cha kiwi ki jaitbru heiwa da pynman chiboon ki yakhih wa ki dorbar chnong wei da phah boon tylli ki dorkhat cha ki chnat wa pait ya ini wei hadien ini da pyndam noh ya kini ki pyrtuid sarok kiwa ymtoh na ki jaitbru ri-loom.
Ka seiñ dap ko dei kmen wa i kwah ki paidbah wa chong chnong da man iwa sakhiat wei ym chong ko kat hadooh wa ye u pynkylla pyrtuid ya kiwi ki sarok wa e pyrtuid cha kiwi kiwa ymtoh ki jaitbru ri-loom wei u krehlang wa ki bor chnong wow pynkylla pyrtuid leh ya kam kini.
