U Montri Rangbah ka jylla, u Conrad K Sangma ynne da ong u wa ka sorkar lyngba ki thong krehkaam ko kiwa har rukom da wanrah ko yei kylla ha i rukom im ki paidbah.
Yeini da ong u ha ka yalang kiwa yoh myntoi ka FOCUS Plus, PROGRESS, YESS Meghalaya wa ki SHG ha Rangatari, South West Garo Hills.
Da ong u wa ka sorkar da kreh ko neibynta ki warep lyngba ka FOCUS wa kiwi ki Scheme wow yarap ya ki. Chooh chooh da ong u wa hapoh ka jylla em hadooh 4.5 lak ki warep wei kani ka sorkar da wanrah ko ya ki Scheme wow myntoi ki.
Heijooh i por da ong u wa ka Focus waka Focus Plus toh kiwa heh dooh ki Scheme neibynta ki warep ha ka thaaiñ mihsngi. “Ka poisa yarap wa T. 5000 daw e cha kawi pa kawi ka manyung ha ki 10 snem wow wan wei ym toh ka ram kawa hap su, kani toh ka poisa yarap ya ki warep,” da ong u Conrad deiwa kyntu ya ki paidbah wym toh u chah yah bakla ki ha kiwi.
Da ong u leh wa hadooh ynne da dep pynlait ka poisa kawa da jan dap T. 150 klur hapoh ka FOCUS waka FOCUS Plus deiwa kyntu wow pynemkaam hok ya kani ka poisa kawa kyrpang ya ki warep wei wym toh leh u chah yah bakla ha kitu kiwa kwah wow pynman Politics ya kani ka Scheme.
Ha kani ka sngi da em 793 ngut ki warep ka Rangatari, South West Garo Hills kiwa da yoh yarap hadooh T. 7.93 Lak na ka FOCUS+. 400 ngut kiwa psan sniang da yoh khon sñiang wa 70 ngut kiwa psan syiar kiwa da yoh ya ki syiar Kuroiler lyngba ka Rural Livestock Piggery & Poultry Scheme ‘PROGRESS’.
