Kiwa yap nei chah siat ha ki pulit ka Assam deilang wa ki pulit ka chnat Forest ka Assam da ku cha 6 ngut heiwa 5 ngut toh kiwa chong chnong ka Mukroh, West Jaiñtia Hills District katwa uwi toh u Forest Guard ka Assam.
Ini da sdang i ynne i step hadien wa kdong ki pulit ka Assam deilang wa ki pulit ka chnat Forest ka Assam ya kawi ka truck wa kit dieñ wei da yoh wow ksoh ya kani ka kari da ki pulit ka Assam deilang wa ki Forest Guard ka Assam ha chnong Mukroh.
Hadien wa tip yeini, kiwa chong chnong ka Mukroh da yalang wei da kerkut ki ya ki pulit ka Assam deilang wa ki Forest Guard ka Assam iwa da wanrah yei siat yap ki 5 ngut kiwa chong chnong ka Mukroh wa uwi u Forest Guard ka Assam.
Kiwa mynsoo ha ini i chah siat da kit ya ki cha Barato PHC wa cha Jowai Civil Hospital, Ialong.
Hadien wa tip yeini, u SP ka West Jaiñtia Hills, ki Magistrate kamjooh u Montri ki Kaam Pohyung ka jylla, u Lahkmen Rymbui da lai ki wut-wut cha ini i thaw wa jia wei da Register FIR da ki pulit ka Meghalaya.
Kiwa yap ha ini wot i thaw wa jia toh u Thal Shadap (55 snem) uwa na chnong Mukroh, Nikhasi Dhar (65 snem), u Sik Talang (55 snem) wa u Forest Guard ka Assam.
Kiwa yap won hadien nei mynsoo toh u Tang Nartiang (40 snem) uwa na chnong Mukroh uwa da khlaad ha Barato PHC wa u Chirup Sumer (40 snem) uwa yap ha Ialong Civil Hospital, Jowai.
Neiliang u Montri Rangbah ka jylla, u Conrad Sangma da phah u ya ka khubor sñiawlem cha kiwa ha-yung ha-sem kiwa khlaad wei da beiñ u leh yeini i psiah ki pulit ka Assam deilang wa ki Forest Guard chapoh ka jylla Meghalaya wei da siat ki khlem daw.
Da ong u leh wa ka sorkar Meghalaya daw leh ko ya waroh iwa emkaam yow pyntikna wa kiwa khlaad yoh ki yei hok wei da pynchitom ya waroh kitu kiwa emkti ha ini i kaam.
Kam ka dak wow leh warom ya kiwa khlaad, ka sorkar da rai ko wow pyndam noh ya waroh ki lehkmen, ki tamasa wa kynthup lang yaka Cherry Blossom Festival.
Da pynbna u leh ya ka poisa yarap kawa T. 5 lak cha kiwa ha-yung ha-sem kiwa khlaad.
Da pyntip u leh wa ki Montri ka sorkar daw yachem ki myntu yow rai heiyatoh wa ini.
Da kyntu u leh ya kiwa chong chnong ka jylla wow duwai neibynta kiwa da khlaad kamjooh ya kiwa ha-yung ha-sem wei heijooh i por wow pynneh yei suk i saaiñ wei ka sorkar u leh ko yeiwa emkaam.
