Ka dhab ki Montri yong ka sorkar Meghalaya Democratic Alliance (MDA) daw lai yachem ki ya u Montri Kaam Pohyung yong ka ri India, u Amit Shah ha ka 24 tarik uni u bnai wow khana yeiwa jia ha Mukroh ynne ka sngi.
Ya ini da pyntip da u Montri Rangbah ka jylla, u Conrad K Sangma hadien wa da wai ka yalang ki Montri ynne i janmiet ka 22 tarik. Da ong u wa ka sorkar Meghalaya daw lai ko wow dawa na u Amit Shah wow thung da ka takit da ki Central Agency, kitæ da ka National Investigation Agency (NIA) lane da ka Central Bureau of Investigation (CBI).
Chooh chooh da ong u wa ha ini i lai cha Delhi, ka sorkar daw lai ko wow yachem leh ya ka National Human Rights Commission (NHRC) wow e kti leh ya ka bui (Report) hajrong i jia ha Mukroh. U Conrad da khana u leh wa ka sorkar da thung ko ya ka Special Investigation Team (SIT) wow takit hajrong itai i jia kawa daw khlieh da u DIG ka Eastern Range, katwa dang lai i dawa wow takit da ki Central Agency.
U Montri Rangbah da khana u leh wa ka sorkar da yatai sani bha ko hawa yatoh wa itai i jia ha Mukroh hadien wa da yoh ya ka bui na ki bor pynlai wa kamjooh na u Montri Kaam Pohyung ka jylla, u Lahkmen Rymbui uwa da lai wow hiar da idæ cha katai ka thaw wow bichaar yei long i man.
Daw thung leh da ka Judicial Commission hapoh ka aiñ Commision of Enquiry Act 1952 yow pait ya waroh iwa jia ha Mukroh.
U Conrad da pyntip u wa najrong wa pynsangeh noh ya ki tamasa waroh, da rai leh da ka sorkar wow pynsangeh noh chwa ya waroh ki yalang sorkar wa kynthup yei wai ya ki kreh wei wow booh mooyurim hadooh ka 30 tarik uni u bnai kam i dak wow pynyoo yei sñiawlem cha kitu kiwa khlaad ha Mukroh.
Mynstep ka 23 tarik, u Montri Rangbah, u Symbood Montri Rangbah deilang wa ki kattu katni ki Montri sorkar daw lai ki cha Mukroh yow yachem wa kiwa ha-yung yong kiwa khlaad wei wow e leh yaka poisa yarap.
