Kam chibynta yong i yakhih wow pyrchah yei chah siat yap ki san ngut ha Mukroh ha ka 22 tarik uni u bnai, ynne ka sngi hapoh ka lama yong ka JAC Ri-Loom Jaiñtia wa kynthup yaka JYF, HWW&DO, HANM, NHP, JSM, HNYF, ka Seiñ Manbei Mookhep, BDRF wa kiwi kiwi da pynman ya ka yalang kamjooh ka lai paidbah.
Yei lai paidbah wa jai-jai da pynman nadooh na Laad Kiang Nangbah Government College chadooh cha Iawmusiang heiwa da kbai ya ki kyntien wow beiñ ya ka sorkar Meghalaya, ka sorkar Assam kamjooh ya ki pulit ka jylla Meghalaya wa Assam.
Manda poi ha Iawmusiang da pynman ya ka yalang ya kawa pynlai da u Paila Lyngkot uwa man u Chairman ka AJCVTA heiwa da yoh ya i klam na u OL Tariang uwa man u President ka JYF heiwa da ong u wa ya ini kaam chah siat khiar ki san ngut lakam wa siat mrad, iwa emkaam katni toh u man kiwa yatylli.
Ka President ka HWW&DO da khana ko wa ki Khasi Pnar kiwa im cha sor im suk ki tangwa kiwa cha thaaiñ khappood won da man ki kiwa chong syir mynsien, tangwa katni emkaam yei yatylli khnang wow pynsuk ya ki waroh kamwa im kiwi cha sor.
Neiliang u Chaniah Suchen na ka HANM da ong u wa katni yoodur lakam wa kani ka sorkar Meghalaya chah pynlai ko ha ka sorkar Assam.
U President ka MPUF, u Dapoiwanmi Laloo hawa e yei klam da kyntu u ya waroh wow kreh heiyatoh wa ini da i stat wa i chemphang ymtoh deiwa chongchit neibhah ini waroh ymtoh nei tlot ki waheh wa kitkaam ki seiñ, namo kiwa mihkhmat sorkar tangwa wa tlot na i ki paidbah wow jied ya kiwa mihkhmat kiwa yieñ dap chynrang wow leh yeiwa emkaam.
Da ong u leh wa ya ini waroh iwa emkaam toh wow pynsñiaw yeiwa emkaam cha ka sorkar pyrdi khnang wow ye ko u pynbait ya u pood u ang ka jylla.
Kawi na ki manbei ka K. Rymbai, na ka seiñ manbei ka chnong Mookhep da ong ko wa waroh emkaam wow man kiwa yatylli deiwa beiñ leh ya ki sorkar. Da ong ko leh wa ki pulit ka Meghalaya da toh u lai kem bait ki ya ki bru kiwa emkti wow siat yap ya ki san ngut ki khon ka chnong Mukroh.
Khaddooh neiliang u Chandame Sungoh uwa man u President ka Hynniewtrep Border Dispute Redressal Forum (HBDRF) da khana u ya ki parom wa da maad chitom ki bru kiwa sah ha khappood khamtam nadooh ki por nachwa.
Ha kani ka sngi da rai leh wow dawa kem noh chisiendon ya kini ki bru wa emkti wow siat yap ya ki san ngut.
