Ka lehniam Kopati Puja toh ka lehniam wa kyrpang yong ki khon ki raiot u Dolloi ka Elaka Raliang wa da pyndep chisien chisnem hadien wa da poi yung u kba u khoo yong ki khon ka Raij ka Elaka.
Ha uni u snem ya kani ka lehniam da sdang nadooh ka sngi Mulong 25 tarik wei da pynkut won ha ka sngi Muchai 27 tarik uni u bnai, deiwa chakri niam chirup u Dolloi, da pyndep ki ya ki sarin yong ka lehniam waman i e ngooh e dem ya u Trekirot, ki Blai ki Syiem, ki Ryngkaw ki samun kiwa da e i kyrkhu khyrdoh wa sarot tam hapoh ka Raij ka Elaka.
Ha ka sngi wa ar yong kani ka lehniam Kopati Puja najrong ka Pastieh niam ha Kloo Blai kamjooh ha yung u Wamon, ka Kopati Puja Cultural Committee da pynman ko leh ka yachemlang wa kyrpang ha madan Chrah Umphula, Raliang heiwa ki khon ka Niamtre na ki San Raij-San Lyngdoh dawan ki wow yachimbynta hei riam i beit wa yoophooh yoophieñ chirup dei sakhilang u Manbha Kyndoh, Dolloi Elaka Narpuh kam u kongsan, deilang u Dolloi Elaka Nangbah, Dolloi Elaka Shangpung, Dolloi Elaka Amwi wa u Dolloi Elaka Jowai.
Haka yalang wa man hei pynlai u Hamjhan Dkhar, u khynroo Dakynsai Dkhar da siang u i ngoohblai ngoohsyiem, u Elad Lyngdoh kam uwi na ki waheh wasian ka Raij Raliang da e u i klam watbian heiyatoh wa ka lehniam Kopati Puja wei chooh chooh da yoh leh i klam i kappæ wa ki kyntien e mynsien ya ki khon ka Raij ka Elaka na ka khyllood Ribakordor Lyngdoh, u Rikut Parien, Waheh Raij Ionglang, u Dolloi Elaka Jowai, u Wh. Puramon Kynjin wa na u Dolloi Elaka Raliang, u Wh. Chawas Lyngdoh.
U Rikut Parien hawa klam da e wyrta chula u hapyrdi ki khon ka Raij ka Elaka chaphang i hiardor yong i maya niam, maya Blai ki bru ha kani ka juk wa katni wei kawa da booh leh hei artatien yei man kyrpang ka jaitbru kat chawa pait wa kyruiñ katwa u Dolloi Elaka Jowai won u Wh. Puramon Kynjing klam u hajrong ka phang wa ong ka Iktiar yong ka Dustur-Riti em ko hei pynlai ka Raij ka Elaka.
U Manbha Kyndoh, Dolloi Elaka Narpuh hawa e kyntien kam u kongsan da ong u wa i ye u ksoh u kune ya ka luti wayah watyoor ki warim toh i burom wa khroo ya ka ri wa ka jaitbru wei chooh chooh da kyrsu kyntu u leh ya ki khon ka Raij ka Elaka wow man kiwa yatylli wei kreh ya ki kaam Raij kaam chnong da ka luti yong i hok wei ya sñiawthooh yumut yoh ka niam ka rukom, dustur riti u heh u kmai na ka pateiñ cha ka pateiñ.
Ha kani ka sngi da pynchoh pynchongchit ya kiwa wan sakhi da ki chaad ki rwai sur tre wa da chimbynta da ki khon khynroo khyllood wa ki manbei na ki Raij ki chnong waphær wei chwa wow poi cha wakut da em leh i pynlait paidbah ki Dolloi ya ka Calendar 2023 yong ka Seinraij Raliang.
