Ka dhab ki Montri sorkar MDA da mynjur ki yaka Meghalaya Mental Health and Social Care Policy, 2022, wei da ini i mynjur, ka Meghalaya da man ko ka jylla kawa 3 hapoh ri India wow pynkrehkaam ya kani ka Policy.
Hawa klam hadien wa da wai ka yalang ynnin ka sngi, u Montri Rangbah ka jylla, u Conrad Kongal Sangma da ong u wa kani ka Policy toh neibynta i bha i biang yong ki bru kiwa chitom ha i bor pyrkhat ka wym jooh em nachwa, wei pynsñiaw u wa kani ka Policy daw yarap ko wow e sumaar hawa yatoh wa i bor pyrkhat khamtam ya ki khynnah wa kiwa dang khynroo.
Ha iwi i liang, u Montri Rangbah da khana u leh wa ka sorkar da mynjur ko leh wow pynkylla namo ka Amendment yaka Meghalaya Victims Compensation Scheme, 2019. Da ong u wa kani ka Policy toh kawa neibynta kitu ki bru kiwa chitom wei mynsoow na ki kaam chah slaitbor wa kiwi ki kaam khlem akor hadooh neibynta kiwa khlaad na ini wa jia wa kynthup ya ki chynrang wa kynthai.
Ya ini i pynkylla da leh katkam ki kyndon ka sorkar pyrdi wei da pynku leh yaka poisa yarap.
