Ka seiñ kiwa da chongngiah nei kreh sorkar hapoh ka lama yong ka Meghalaya Pensioner Association Jaiñtia Unit, ynne ka sngi da pynkup burom ko ya u khynroo Weibha Nongtdu Lakiang uwa puræ ha skur North Liberty Higher Secondary School, Jowai hajrong i poi u chakhmat dooh haka Result SSLC 2022 napyrdi ki khynroo khyllood puræ ha Ri-loom Jaiñtia.
Uni u khynroo toh uwa da wan haka kyrdan 3rd Position yong ka kyrdan Top 20 ka Result SSLC wada pynbna daka MBOSE ha uni u snem.
Yei pynkup burom da leh ha ka North Liberty Higher Secondary School hi kawa uni u khynroo dang pteiñ u yei puræ hei sakhi lang ki khynnah skur wa kiwa sikai skur.
Kamtæ kam ka dak u e mynsiem chooh chooh ya uni u khynroo kamjooh ya kiwi ki khynnah skur u bood ki yei nongmuna yong oo, ka seiñ da e kti ko ha oo ka tiar sahkynmoo deilang ka song poisa wa T. 10,000.
U President ka Meghalaya Pensioner Association Jaiñtia Unit, u L. Shylla hawa klam ong u kani toh ka sien wa ar wa kam ka seiñ da wan yooh kjat ko u pynkup burom ya kiwa puræ kani ka skur, wei kamwa da em ko ka rai u pynkup burom ya kiwon kiwon wa poi chakhmat dooh haka Result na Ri-loom Jaiñtia, pynkynmoo u wa haki snem chadien da wan yooh kjat pynkup burom ki haka skur Sawlyngdoh Higher Secondary School Mowkaiaw, ha Sohkha Higher Secondary School deiwa sñiawkmen leh wa ha kani ka kynti da poi biang ki ha kani ka skur.
Neitæ kyntu haroh u ya waroh ki khynnah skur wow man kiwa kreh chitom khang yow yoh pdiang ki kam kani ka pynkup burom.
Chwa ini da yoh i klam yahkhmat na u Vice Principal ka North Liberty Higher Secondary School, u Risingstar Kharrngi, neitæ da pynkut won yei yalang dei kyntien e khublei naka Kongka Ranida Shylla.
