Ka Society for Urban and Rural Empowerment (SURE) lyngba ka Project Link Worker Scheme (LWS) kawa da kyrchaan da ka Meghalaya Aids Control Society (MACS) da pynman ko ya ka lehwarom wa kyrpang neibynta wow yakhun ya ka kjut AIDS.
Katwa dang lai ki sngi, i kjut AIDS da poor i cha ki sor wa ki palatsor heiwa ha ka jylla Meghalaya leh kiwa kjut dang boon ki kat dang mih ki por ki sngi.
Ya ka sngi World AIDS Day ka SURE da pynman ko ynne ka sngi ha Hall ka H.K.Singh School, ryngkat i krehlang u Headmaster ka skur.
Ha ka yalang da pynsñiawthooh hajrong kani ka kjut da ka Niwanka L. Shylla kawa man ka Zonal Supervisor ka Project LWS yong ka SURE.
Da klam chwa da u Teiborlang Passah, Headmaster ka skur uwa da sñiawngooh ya ka SURE kawa da pynman ya ini i pynche pynsñiawthooh paidbah hapoh ka skur wei da kyrmen u wow myntoi ki na kani ka sngi.
U Dr. H.H.Mohrmen, uwa man u Secretary ka SURE hawa maitpyrdi da ban joor u wow pynryngkat salonsar (Equalize) ya waroh deiwa ong leh wa ymye wow yakhun pyrchah ya ini i kjut kat wym pu yaryngkat hei longbru manbru wei deiwa burom lang ya kiwa yoh HIV/AIDS kamwa kiwi de kiwa chong chnong man ko kawa kongsan tam.
Ka Coriniki Slong kawa man ka District Resource Person (DRP) LWS Project da ban khia ko yeiwa eh i khor wa chem ki paidbah wa ymtoh wow kyntait ya ki bru wa em kani ka kjut.
Da ong u leh wa boon ki bru da tip ki chaphang ya kani ka kjut HIV/AIDS wei kammon yabi ko para bru tangwa sñiawsih won ko leh wow yoo hadooh katni dang em kiwa chah yoobeiñ kiwa im wa ini i kjut.
Kiwi kiwa da klam ha kani ka sngi toh u Comfort Challam wa ka Dakapaka Shullai kiwa man ki Link Worker yong ka SURE.
