U Montri Rangbah ka Meghalaya, u Conrad K Sangma, ynne da wai u ya ka yung krehkaam wa dang chna thymme yong ka Prime Hub-cum-Head Office ka All Garo Hills Multipurpose Cooperative Society (AGHMCS) Ltd. ha Babadam wa em hapoh ka Rongram C&RD Block deiwa emlang u Chief Adviser u Montri Rangbah, u Thomas A Sangma, u Secretary ka AGHMCS wa Director ka Bakdil NGO, u Fr. Sunny Mavellil, u BDO ka Rongram, u MR Marak, ki Parish Priest, ki Nokma wa kiwi de.
Ya kani ka yung krehkaam kani ka Cooperative Society toh kawa da kwah da slem u chna wei da kynmoo u Montri Rangbah yei kreh chitom u Fr. Sunny Mavellil uwa da emkti wow pynkylla dur ya kani ka AGHMCS deiwa booh thong wow pynkylla yei rukom im ki warep ka Garo Hills wei da yaroh u leh wa da ye wow pyndep yeini hapoh chi snem heiwa ya u mooyurim da booh haka 20-12-21.
Da ong u wa em boon ki moochynthut hawa wanrah ya kiwon kiwon ki kylla, deiwa ong leh wa ka Garo Hills emlaad ko chiboon wow ku wei da emkaam leh wow em ki Cooperative yow pynku yei yoh i kot ka thaaiñ waroh kawi. Deiwa khana wa ka sorkar da dep sdang ko ya ka FOCUS wa FOCUS Plus yow yarap ya ki warep.
U Fr. Sunny Mavellil da khana u wa ka sorkar da pynlait poisa ko T. 3.30 klur yow chna ya kani ka yung krehkaam wei neiliang ka AGHMCS won da pynlut ko T. 3.65 klur yow booh ya ki thaw chna marbaam deilang ki Processing Unit neibynta u syiñ, u Cashew, u murit wa kiwi kiwi. Da khana u leh wa da em 30 tylli ki Coperative Society hapoh Garo Hills.
Ha kani ka sngi, u Montri Rangbah leh da saam u ya ki Cheque cha ki seiñ ki warep ka Garo Hills hapoh ka FOCUS.
