U soh Khontara ka jylla Meghalaya uwa da pawnaam bha uwa da tip leh hei ktien kiwi kam u Khasi Mandarin hei sien nyngkong (kam wow pyrchang) da chalan ya oo cha Dubai da ka Agricultural and Processed Food Products Export Development Authority (APEDA) kawa man ka chnat sorkar wa pynlai yaaw ya ki mar cha baar ri deiwa booh leh yaka Geographical Identification (GI) Tag No-465 yow pynyoo neiwon mih u.
Uni u soh Khontara ka jylla toh uwa langdong bha, uwa stang snieh wei uwa skah bha i soh wei uwa thiang bha hawa nujor wa kiwi kiwa boon wei da rep ya oo da i rukom wa da leh nadooh i por warim.
Ya ini da leh deiwa krehlang waka chnat Horticulture ka jylla Meghalaya wei uni u soh wa chalan nyngkong toh uwa mih na Jirang, Ri-Bhoi District uwa da thung hapoh i pait ka Mission Organic Value Chain Development for North Eastern Region (MOVCDNER).
Ya ka kari wa kit ya kini ki soh da kaweh lama da u State Agriculture Secretary, u S Sadhu ynnin ka 1 tarik deiwa emlang kiwi ki heh sorkar heiwa u Sadhu da ong u wa uni u soh toh uwa da thung da heh da san khlem pynemkaam dawai, kamtæ da man u uwa khooid bha.
Da pyntip leh ka thaaiñ mihsngi hi waroh kawi katni da ku bha i chalan ya ki mar rep iwa da ku da 85.34% kiwa da lai cha ki ri kam ka Bangladesh, Bhutan, Middle East, UK wa Europe. Heiwa ha u snem 2016-17 da chalan USD 2.52 Million katwa ha u 2021-22 da ku cha USD 17.2 Million.
U soh Khontara wa da phah ha kani ka sien wa nyngkong toh 1 Tonne.
